जयपूर : गे डेटिंग ॲप्सच्या माध्यमातून तरुणांशी मैत्री करून त्यांना भेटण्यासाठी बोलावायचे आणि त्यानंतर हल्ला करून ब्लॅकमेल करत पैसे उकळायचे, असा आरोप असलेल्या टोळीचा जयपूर पोलिसांनी तपास सुरू केला आहे. या प्रकरणात करधनी पोलिसांनी दोन जणांना अटक केली असून, गुन्ह्यात वापरलेली कारही जप्त करण्यात आली आहे.
पोलिसांकडे गे डेटिंग ॲप्सच्या माध्यमातून तरुणांना लक्ष्य करून त्यांच्याकडून पैसे उकळले जात असल्याच्या तक्रारी आल्या होत्या. त्यानंतर जयपूर पश्चिम पोलिसांनी या प्रकरणाची गंभीर दखल घेत तपासासाठी पथक तयार केले. आरोपी कथितपणे डेटिंग ॲपवर तरुणांशी संपर्क साधायचे. काही काळ चॅटिंग करून मैत्री वाढवल्यानंतर त्यांना तुलनेने निर्जन ठिकाणी भेटण्यासाठी बोलावले जात असल्याचा आरोप आहे.
बोलवायचे आणि नंतर...
पीडित व्यक्ती भेटण्यासाठी आल्यानंतर त्याच्यावर हल्ला करून धमकावले जात असल्याची माहिती तपासात समोर आली. त्यानंतर संबंधित व्यक्तीला ब्लॅकमेल करून पैशांची मागणी केली जात असल्याचा आरोप आहे.
तपासादरम्यान पोलिसांनी तांत्रिक माहिती आणि मिळालेल्या गुप्त माहितीद्वारे संशयितांचा माग काढला. त्यानंतर करधनी पोलिसांनी अनिल रुलानिया आणि मदन नेहरा या दोघांना अटक केली. त्यांच्याकडून गुन्ह्यात वापरल्याचा संशय असलेली कारही पोलिसांनी ताब्यात घेतली आहे.
आता पोलिसांकडून आरोपींची चौकशी सुरू असून, त्यांनी आतापर्यंत किती जणांना लक्ष्य केले, याचा शोध घेतला जात आहे. तसेच या प्रकरणात आणखी किती जणांचा सहभाग आहे आणि हे जाळे जयपूरबाहेरही पसरले आहे का, याची माहिती पोलीस घेत आहेत.
दोन्ही आरोपींच्या चौकशीतून या कथित टोळीच्या कामाची पद्धत आणि इतर संभाव्य गुन्ह्यांची माहिती समोर येण्याची शक्यता आहे. त्यामुळे या प्रकरणातील पुढील तपासाकडे लक्ष लागले आहे.