Nepal Flash Flood 2026 : नेपाळमध्ये निसर्गाचा कहर! १६० जणांचा मृत्यू; ७५० हून अधिक बेपत्ता, १३३ भारतीयांचा समावेश

काठमांडू : नेपाळ-तिबेट सीमेवर आलेल्या भीषण फ्लॅश फ्लडने मोठ्या प्रमाणात हाहाकार माजवला आहे. भोटेकोशी नदीला आलेल्या महापुरामुळे नेपाळमधील अनेक भाग उद्ध्वस्त झाले असून, ताज्या माहितीनुसार नेपाळ आणि चीनमध्ये मिळून मृतांचा आकडा सुमारे १६० वर पोहोचला आहे. तर ७५० हून अधिक जण बेपत्ता असल्याची माहिती समोर आली आहे. बेपत्ता असलेल्यांमध्ये किमान १३३ भारतीय नागरिकांचा समावेश असल्याचे वृत्त आहे. (Nepal Flash Flood 2026)

नेपाळच्या रसुवा जिल्ह्यातील भोटेकोशी नदीला अचानक आलेल्या महापुराने मोठ्या प्रमाणात विध्वंस केला. प्राथमिक माहितीनुसार, नेपाळ-तिबेट सीमेवरील डोंगराळ भागात झालेल्या हिमस्खलन आणि भूस्खलनामुळे नदीचा प्रवाह अचानक वाढला. काही मिनिटांतच पाण्याचा प्रचंड लोंढा खालील भागात आला आणि रस्ते, पूल, घरे, वाहने तसेच इतर पायाभूत सुविधा वाहून गेल्या. (Nepal Flash Flood 2026)

या दुर्घटनेचा सर्वाधिक फटका रसुवा आणि आसपासच्या भागांना बसला आहे. भोटेकोशी आणि त्रिशूली नदी प्रणालीतून पुराचे पाणी पुढे सरकल्याने अनेक जिल्ह्यांमध्ये परिस्थिती गंभीर झाली. नेपाळमधील अनेक रस्ते आणि पूल खराब झाले असून, जलविद्युत प्रकल्पांचेही मोठे नुकसान झाले आहे. (Nepal Flash Flood 2026)

भारतीय पर्यटक आणि यात्रेकरूंची चिंता वाढली :

बेपत्ता असलेल्या भारतीयांमध्ये कैलास मानसरोवर यात्रेवर गेलेल्या नागरिकांचाही समावेश आहे. नेपाळ पर्यटन मंडळाने बेपत्ता प्रवासी आणि पर्यटकांचा शोध घेण्यासाठी स्थानिक प्रशासन, सुरक्षा यंत्रणा, पर्यटन संस्था आणि ट्रॅव्हल एजन्सींसोबत समन्वय सुरू केला आहे. उपलब्ध आकडेवारीनुसार भारतीय नागरिकांची संख्या १३३ असल्याचे ताज्या वृत्तांत नमूद करण्यात आले आहे. (Nepal Flash Flood 2026)

बचावकार्य युद्धपातळीवर :

पुरामुळे अनेक दुर्गम भागांचा संपर्क तुटल्याने बचावकार्याला मोठ्या अडचणींचा सामना करावा लागत आहे. नेपाळी सुरक्षा दलांकडून हेलिकॉप्टर आणि इतर साधनांच्या मदतीने अडकलेल्या नागरिकांना सुरक्षित स्थळी हलवले जात आहे. खराब हवामान आणि उद्ध्वस्त झालेल्या रस्ते-पुलांमुळे मदतकार्य अधिक आव्हानात्मक ठरत आहे. (Nepal Flash Flood 2026)

भारताकडून मदतीचा हात :

या भीषण नैसर्गिक आपत्तीनंतर भारताने नेपाळला मदतीचा हात पुढे केला आहे. पंतप्रधान नरेंद्र मोदी यांनी नेपाळचे पंतप्रधान बालेन्द्र शाह यांच्याशी संवाद साधून भारताकडून शक्य ती मानवतावादी मदत देण्याचे आश्वासन दिले आहे. भारताकडून मदत आणि आपत्ती निवारणासाठी आवश्यक पावले उचलली जात आहेत. (Nepal Flash Flood 2026)

नेपाळमधील या महापुरामुळे भारताच्या सीमावर्ती भागांमध्येही सतर्कता वाढवण्यात आली आहे. नदीच्या पाण्याची पातळी वाढण्याची शक्यता लक्षात घेऊन संबंधित प्रशासनाकडून नागरिकांना सावध राहण्याचे आवाहन करण्यात येत आहे. (Nepal Flash Flood 2026)