मुंबई : मुंबईतील कुर्ला पश्चिमेकडील सुंदरबाग परिसरात रस्त्यावरील स्टॉलवरून मोमोज खाल्ल्यानंतर 16 जणांना अन्नबाधा झाल्याची धक्कादायक घटना समोर आली आहे. बाधितांमध्ये लहान मुलांचाही समावेश असून, प्रकृती बिघडल्यानंतर त्यांना तातडीने कुर्ला येथील भाभा रुग्णालयात दाखल करण्यात आले. (Kurla News)
मिळालेल्या माहितीनुसार, मोमोज खाल्ल्यानंतर काही वेळातच नागरिकांना उलट्या, जुलाब, तीव्र पोटदुखी, ताप आणि चक्कर येण्यास सुरुवात झाली. एकापाठोपाठ अनेकांची प्रकृती बिघडल्याने परिसरात चिंता निर्माण झाली. या घटनेनंतर सर्व बाधितांना उपचारासाठी रुग्णालयात नेण्यात आले. (Food Poisoning)
यातील 14 जणांना रुग्णालयात दाखल करून उपचार सुरू करण्यात आले आहेत. तर 2 जणांवर बाह्यरुग्ण विभागात प्राथमिक उपचार करण्यात आल्यानंतर त्यांना घरी सोडण्यात आले. रुग्णालयात दाखल असलेल्या 14 जणांमध्ये 3 ते 14 वर्षे वयोगटातील काही मुलांचाही समावेश आहे. (Mumbai)
घटनेची माहिती मिळताच मुंबई महानगरपालिकेच्या आरोग्य समितीचे अध्यक्ष हरिश नायर यांनी भाभा रुग्णालयाला भेट दिली. त्यांनी रुग्णांची विचारपूस केली तसेच डॉक्टरांकडून त्यांच्या प्रकृतीची आणि सुरू असलेल्या उपचारांची माहिती घेतली. (Hospital)
सध्या सर्व रुग्णांची प्रकृती स्थिर असल्याचे सांगण्यात आले असून डॉक्टर त्यांच्या प्रकृतीवर लक्ष ठेवून आहेत. मात्र, या घटनेमुळे रस्त्यावरील खाद्यपदार्थांची स्वच्छता आणि त्यांची गुणवत्ता याबाबत पुन्हा एकदा प्रश्न उपस्थित झाला आहे. संबंधित खाद्यपदार्थामुळेच अन्नबाधा झाली का, याबाबत पुढील तपास आणि आरोग्य विभागाच्या कारवाईकडे लक्ष लागले आहे. (Street Food)