मुंबई : दहीहंडी उत्सवाच्या निमित्ताने टेलिव्हिजन जर्नलिस्ट असोसिएशन (TVJA)च्या सदस्यांनी वरळी येथील NSCI डोममध्ये मानवी मनोरा उभारत उत्साह, साहस आणि पत्रकारांच्या एकतेचे दर्शन घडविले. (TVJA Dahi Handi)
दहीहंडी हा महाराष्ट्राच्या मातीत रुजलेला पारंपरिक आणि साहसी खेळ आहे. काळानुसार या उत्सवाचे स्वरूप बदलत असले, तरी प्रो-गोविंदा स्पर्धांमुळे या क्रीडाप्रकाराला मोठे व्यासपीठ मिळाले आहे. याच पार्श्वभूमीवर TVJAच्या सदस्यांनी कोणत्याही स्पर्धेचा भाग न बनता केवळ आनंद, मैत्री आणि आपुलकी जपण्याच्या उद्देशाने गोविंदा पथकाची उभारणी केली. (TVJA Dahi Handi)
मानवी मनोरा उभारण्यासाठी सदस्यांनी गेल्या काही दिवसांपासून सराव आणि प्रशिक्षण घेतले. त्यानंतर वरळीतील NSCI डोम येथे आयोजित दहीहंडी उत्सवात सहभागी होत त्यांनी थर रचत गोविंदाचा थरार अनुभवला. यावेळी उपस्थितांनी गोविंदांच्या साहसी खेळाला उत्स्फूर्त प्रतिसाद देत त्यांचा उत्साह वाढविला. (TVJA Dahi Handi)
दैनंदिन बातम्यांचे कव्हरेज आणि पत्रकारितेच्या धावपळीतून काही काळ बाजूला होत TVJAच्या सदस्यांनी पारंपरिक दहीहंडी उत्सवाचा मनमुराद आनंद घेतला. या उपक्रमामुळे सदस्यांमधील मैत्री, आपुलकी आणि संघभावना अधिक दृढ झाली. ‘थरांच्या उंचीपेक्षा TVJAच्या एकतेची उंची मोठी’ हा संदेश देत पार पडलेल्या या उपक्रमाने दहीहंडी उत्सवाला सामाजिक आणि संघटनात्मक एकतेची वेगळीच किनार दिली. (TVJA Dahi Handi)