अमेरिकेत आपल्या प्रेयसीची भयंकर हत्या करून भारतात पळून आलेल्या एका आरोपीला आग्रा येथून पोलिसांनी अटक केली आहे. अर्जुन शर्मा (Arjun Sharma) असे या आरोपी सॉफ्टवेअर इंजिनिअरचे नाव आहे. अमेरिकन पोलिसांच्या कारवाईपासून वाचण्यासाठी तो आग्रा येथील एका अपार्टमेंटमध्ये नाव व ओळख लपवून राहत होता. मात्र, हैदराबाद पोलीस आणि स्थानिक पोलिसांनी संयुक्त कारवाई करत त्याला बेड्या ठोकल्या आहेत. अटकेनंतर त्याला दिल्लीच्या पटियाला हाऊस कोर्टात हजर करण्यात आले असून न्यायालयाने त्याला पोलीस कोठडी सुनावली आहे. आता कायदेशीर प्रक्रिया पूर्ण करून त्याला अमेरिकन प्रशासनाच्या स्वाधीन (प्रत्यर्पण) केले जाण्याची शक्यता आहे.
पैशांच्या वादातून प्रेयसीचा खून अन्...
हे संपूर्ण प्रकरण अमेरिकेतील मॅरिलँड राज्यातील हॉवर्ड काउंटी परिसरातील आहे. तिथे २७ वर्षांच्या निकिता गोडिशाला या तेलगू तरुणीची चाकूने भोसकून अत्यंत निर्घृणपणे हत्या करण्यात आली होती. पोलिसांच्या माहितीनुसार, ही घटना ३१ डिसेंबर ते २ जानेवारी २०२६ या काळात घडली होती. निकिता आणि अर्जुन यांच्यात पैशांवरून मोठा वाद सुरू होता आणि याच वादातून तिच्या माजी प्रियकराने (अर्जुन) तिची हत्या केल्याचा आरोप निकिताच्या वडिलांनी केला आहे. हत्येचा हा प्रकार अमेरिकन पोलिसांच्या लक्षात येण्यापूर्वीच अर्जुन तेथून पळून भारतात आला होता.
आग्रा येथील अपार्टमेंटमध्ये भाड्याने घेतला होता फ्लॅट
अमेरिका सोडून भारतात आल्यानंतर आरोपी अर्जुन शर्मा सुमारे १५ दिवसांपूर्वी आग्रा येथे पोहोचला होता. तेथील एकता पोलीस ठाण्याच्या हद्दीत असणाऱ्या 'शंकर ग्रीन अपार्टमेंट'मध्ये त्याने १२ व्या मजल्यावर फ्लॅट नंबर १२०२ भाड्याने घेतला. तिथे तो कोणतीही नोकरी न करता ओळख लपवून राहत होता. दरम्यान, हैदराबादच्या लल्लागुडा पोलीस ठाण्याच्या पथकाला आरोपीचा माग काढण्यात यश आले. हैदराबाद पोलिसांनी आग्रा पोलिसांच्या मदतीने अपार्टमेंटवर छापा टाकून त्याला ताब्यात घेतले.
अमेरिकेकडून हस्तांतरणाची मागणी; कायदेशीर प्रक्रिया सुरू
अटकेनंतर अर्जुनला दिल्लीतील पटियाला हाऊस कोर्टात अतिरिक्त मुख्य न्यायदंडाधिकारी अनिमेष भास्कर मणी त्रिपाठी यांच्यासमोर हजर करण्यात आले. अमेरिकन प्रशासनाने अर्जुनविरोधात आधीच गैर-जमानती वॉरंट जारी केले असून त्याला अमेरिकेत परत पाठवण्यासाठी भारत सरकारकडे अधिकृत विनंती केली आहे. न्यायालयाने या सर्व बाबी लक्षात घेऊन आरोपीची कोठडीत रवानगी केली आहे. आता आवश्यक त्या कायदेशीर औपचारिक बाबी पूर्ण करून त्याला लवकरच अमेरिकन पोलिसांच्या हवाली केले जाईल.