पालघर : पालघर जिल्ह्यातील (Palghar) डहाणू तालुक्यात (Dahanu News) एक अत्यंत धक्कादायक आणि गूढ घटना उघडकीस आली असून, १७ वर्षीय अल्पवयीन मुलीचा संशयास्पद परिस्थितीत मृत्यू झाला आहे. कासा पोलीस ठाण्याच्या हद्दीत घडलेल्या या घटनेमुळे संपूर्ण परिसरात तीव्र खळबळ उडाली आहे. प्राप्त माहितीनुसार, ही मुलगी तिच्या पालघरमधील प्रियकराच्या घरी गेली होती. तिथे असताना अचानक तिची तब्येत बिघडली. त्यानंतर पहाटेच्या सुमारास घराबाहेर पडताना पाय घसरून ती खाली पडली आणि तिच्या डोक्याला गंभीर दुखापत झाली, असा दावा केला जात आहे. स्थानिक नागरिकांनी तिला तातडीने उपचारासाठी कासा येथील रुग्णालयात नेले; मात्र डॉक्टरांनी तपासणीअंती तिला मृत घोषित केले.
या घटनेमुळे मुलीच्या कुटुंबावर दुःखाचा डोंगर कोसळला असून त्यांनी या मृत्यूबाबत तीव्र संशय व्यक्त केला आहे. केवळ पाय घसरून पडल्याने एवढी गंभीर दुखापत होऊन मृत्यू कसा होऊ शकतो, असा प्रश्न उपस्थित करत कुटुंबीयांनी घातपाताची शक्यता वर्तवली आहे. मुलगी प्रियकराच्या घरी का गेली होती, तिची प्रकृती अचानक कशी बिघडली, ती पहाटेच्या वेळी एकटीच बाहेर का पडली आणि डोक्यावरील दुखापत नेमकी कशामुळे झाली, या सर्व बाबींची सखोल चौकशी करण्याची मागणी आता जोर धरत आहे.
याप्रकरणी कासा पोलिसांनी अपमृत्यूची नोंद करून तपासाची चक्रे वेगाने फिरवली आहेत. घटनेच्या वेळी उपस्थित असलेल्या लोकांचे तसेच प्रियकराचे जबाब नोंदवले जात असून प्रत्यक्ष घटनास्थळाची पाहणी केली जात आहे. मुलीचा मृत्यू नेमका अपघाताने झाला की यामागे काही मोठे कारस्थान आहे, याचे सत्य शवविच्छेदन अहवाल (Post-Mortem Report) आणि पोलीस तपासानंतरच समोर येईल. सध्या या घटनेने संपूर्ण तालुक्याचे लक्ष पोलीस तपासाकडे वेधले गेले आहे.