मुंबई : मुंबईच्या उपनगरीय रेल्वे प्रवासात एका अत्यंत अनोख्या आणि आगळ्यावेगळ्या दहीहंडी उत्सवाची दृश्ये समोर आली आहेत. गुरुवारी जन्माष्टमीच्या निमित्ताने महिला प्रवाशांच्या एका गटाने धावत्या लोकल ट्रेनमध्येच पारंपरिक पद्धतीची दहीहंडी साजरी केली. तुडूंब भरलेल्या डब्यात गाण्यांच्या तालावर नाचत, जल्लोष करत महिलांनी मानवी मनोरा रचला आणि हंडी फोडली. या संपूर्ण प्रकारचा व्हिडिओ सोशल मीडियावर तुफान व्हायरल झाला असून नेटकऱ्यांचे लक्ष वेधून घेत आहे.
मुंबई : मुंबई सेंट्रल (Mumbai Central) ते वलसाड (Walsad) दरम्यान जाणाऱ्या ५९०२३ जलद पॅसेंजर ट्रेनमध्ये काही प्रवाशांकडून चक्क पैसे लावून जुगार खेळला जात असल्याचा आणि ...
हा प्रकार बदलापूर ते ठाणे दरम्यान धावणाऱ्या सकाळी ७:५६ च्या लोकल ट्रेनमधील असल्याचे सांगितले जात आहे. मुंबईतील मैदानांमध्ये होणाऱ्या दहीहंडी उत्सवाची वाट न पाहता, या महिला प्रवाशांनी रोजच्या प्रवासादरम्यानच सणाचा आनंद लुटण्याचा निर्णय घेतला. व्हायरल व्हिडिओमध्ये ट्रेनच्या छताला असलेल्या हँडल्सना दहीहंडी बांधलेली दिसत आहे. सणाचा आनंद साजरा करताना या महिलांनी दोन थरांचा मानवी मनोरा रचला; ज्यामध्ये एका ज्येष्ठ महिला खाली उभ्या राहिल्या, तर त्यांच्या खांद्यावर चढून एका तरुण मुलीने वर बांधलेल्या हंडीपर्यंत पोहोचण्याचा प्रयत्न केला.
मनोऱ्याच्या शिखरावर पोहोचल्यानंतर या तरुणीने यशस्वीरीत्या दहीहंडी फोडली. हंडी फुटताच संपूर्ण डब्यात महिलांचा एकच जल्लोष आणि टाळ्यांचा कडकडाट झाला. ट्रेन सुरू असतानाच इतर अनेक महिला प्रवाशीही आनंदाने नाचताना आणि या क्षणाचा आनंद घेताना दिसत आहेत. सोशल मीडियावर या व्हिडिओवर संमिश्र प्रतिक्रिया उमटत आहेत. काही जणांनी महिलांच्या या उत्साहाचे आणि अनोख्या सेलिब्रेशनचे कौतुक केले आहे, तर काहींनी सुरक्षेच्या कारणास्तव धावत्या ट्रेनमध्ये असे करणे योग्य आहे का, असा सवाल उपस्थित केला आहे.
मुंबई आणि परिसरात शुक्रवारी गोपाळकाल्याचा सण मोठ्या उत्साहात साजरा केला जात असून ठिकठिकाणी गोविंदा पथके मोठमोठे मनोरे रचण्यासाठी सज्ज झाली आहेत. बाळकृष्णाच्या बाललीलांचे स्मरण करणाऱ्या या सणात उंचावर बांधलेली दहीहंडी फोडण्याची परंपरा आहे. अशा वातावरणात बदलापूर लोकल ट्रेनमधील या महिला गोविंदांच्या दहीहंडीची सर्वत्र जोरदार चर्चा रंगली आहे.