मुंबई : भारतरत्न डॉ. बाबासाहेब आंबेडकर (Dr. Babasaheb Ambedkar) यांनी स्थापन केलेल्या ऐतिहासिक 'पीपल्स एज्युकेशन सोसायटी'च्या (People Education Society) विश्वस्तपदी महाराष्ट्र विधानसभेचे उपाध्यक्ष तथा आमदार अण्णा बनसोडे (Anna Bansode) यांची सर्वानुमते निवड करण्यात आली आहे. डॉ. बाबासाहेब आंबेडकरांचा शैक्षणिक आणि सामाजिक वारसा अधिक सक्षमपणे पुढे नेण्यासाठी आणि विद्यार्थ्यांना चांगल्या सुविधा उपलब्ध करून देण्यासाठी प्रामाणिक प्रयत्न करू, असा निर्धार अण्णा बनसोडे यांनी यावेळी व्यक्त केला.
मुंबईतील गरवारे क्लब येथे केंद्रीय सामाजिक न्याय राज्यमंत्री तथा पीपल्स एज्युकेशन सोसायटीचे अध्यक्ष रामदास आठवले (Ramdas Athavle) यांच्या अध्यक्षतेखाली संस्थेच्या कार्यकारिणीची महत्त्वपूर्ण बैठक पार पडली. या बैठकीत आमदार अण्णा बनसोडे यांची विश्वस्तपदी निवड करण्याची घोषणा करण्यात आली आणि कार्यकारिणीने त्यांच्या नावावर शिक्कामोर्तब केले.
Dhule Crime : धुळे जिल्ह्यातून एक महत्त्वाची बातमी समोर आली आहे. हायवा वाहनातून गौण खनिजाची वाहतूक सुरळीत सुरू राहावी तसेच अवैध गौण खनिज वाहतुकीबाबत कोणतीही ...
शैक्षणिक कार्याला नवी दिशा मिळेल - रामदास आठवले
वंचित घटकांसाठी काम करण्याचा निर्धार - अण्णा बनसोडे
आपल्या निवडीबद्दल कृतज्ञता व्यक्त करताना विधानसभेचे उपाध्यक्ष अण्णा बनसोडे म्हणाले, "डॉ. बाबासाहेब आंबेडकर यांनी शिक्षणाच्या माध्यमातून समाजातील वंचित, शोषित आणि दुर्बल घटकांना सक्षम करण्याच्या उदात्त हेतूने या संस्थेची स्थापना केली होती. या संस्थेच्या माध्यमातून शिक्षणाचा विस्तार करणे, विद्यार्थ्यांना अत्याधुनिक शैक्षणिक सुविधा उपलब्ध करून देणे आणि बाबासाहेबांचे विचार तळागाळातील विद्यार्थ्यांपर्यंत पोहोचवणे हे माझे प्राथमिक कर्तव्य असेल."
बैठकीस मान्यवरांची उपस्थिती
गरवारे क्लब येथे झालेल्या या बैठकीला संस्थेचे अध्यक्ष रामदास आठवले यांच्यासह माजी युजीसी अध्यक्ष सुखदेव थोरात, संचालक उज्ज्वल निकम, डॉ. वासुदेव गाडे, बी. के. बर्वे, विश्वास पाटील, डॉ. वेंकटा स्वामी, अरविंद सोनटक्के आणि डॉ. एस. के. भागवत यांच्यासह कार्यकारिणीचे इतर सदस्य व मान्यवर मोठ्या संख्येने उपस्थित होते.