मुंबई : दक्षिण मुंबईतील प्रसिद्ध सैफी रुग्णालयाने (Saifee Hospital) आपल्या एका प्रथम वर्षाच्या प्रशिक्षणार्थी (ट्रेनी) महिला डॉक्टरविरुद्ध मुंबई उच्च न्यायालयात तब्बल १२५ कोटी रुपयांचा मानहानीचा दावा दाखल केला आहे. सोशल मीडियावर दोन पोस्ट शेअर करून रुग्णालयाची आणि तिथल्या डॉक्टरांची नाहक बदनामी केल्याचा ठपका रुग्णालय प्रशासनाने या महिला डॉक्टरवर ठेवला आहे.
प्रशिक्षणार्थी महिला डॉक्टरचे गंभीर आरोप
अशिया खान लुकमान असे या प्रशिक्षणार्थी डॉक्टरचे नाव आहे. तिने सोशल मीडियावर पोस्ट करत आरोप केला होता की, सैफी रुग्णालय आणि तिथले वरिष्ठ डॉक्टर्स प्रशिक्षणार्थी डॉक्टरांना नियमापेक्षा जास्त वेळ काम करायला लावतात. तसेच तिथे ट्रेनी डॉक्टरांचे रॅगिंग केले जाते आणि त्यांना प्रचंड मानसिक त्रासाला सामोरे जावे लागत आहे.
रुग्णालय प्रशासनाने सर्व आरोप फेटाळले
कामातील निष्काळजीपणा आणि उपस्थितीवरून वाद
अशिया खान यांनी फेब्रुवारी महिन्यात 'नॅशनल बोर्ड ऑफ एक्झामिनेशन्स' (DNB) च्या जनरल सर्जरीच्या प्रशिक्षणार्थी म्हणून सैफी रुग्णालयात काम सुरू केले होते. मात्र, रुजू झाल्यापासूनच त्यांच्या उपस्थितीवरून आणि कामातील निष्काळजीपणावरून तक्रारी सुरू झाल्या. मार्च ते मे दरम्यान त्या कोणत्याही पूर्वपरवानगीशिवाय गैरहजर राहिल्या, ज्यामुळे रुग्णालयाच्या रोजच्या कामकाजावर परिणाम झाला, असा आरोप रुग्णालयाने केला आहे.
मुंबई : गणेशोत्सवासाठी कोकणात जाणाऱ्या गणेशभक्तांची वाहतूक सुरळीत राहावी आणि मुंबई-गोवा राष्ट्रीय महामार्ग क्रमांक ६६ वरील वाहतूक कोंडी टाळता यावी, ...
वारंवार नोटिसा आणि तक्रार
रुग्णालय प्रशासनाने अशिया यांना कामात सुधारणा करण्यासाठी अनेकदा नोटिसा दिल्या आणि त्यांच्या वर्तनाची तक्रार वैद्यकीय शिक्षण मंडळाकडे (NBEMS) केली. ३ जून रोजी पाठवलेल्या पत्रात रुग्णालयाने नमूद केले होते की, २० मे पासून या डॉक्टरने एकाही रुग्णाची तपासणी केलेली नाही. त्या कामाच्या वेळी अनुपस्थित असतात आणि नोटिसांना उत्तरही देत नाहीत. ४ जून रोजी झालेल्या बैठकीत त्यांनी स्वतःच्या चुका मान्य केल्या होत्या, असा दावाही रुग्णालयाने केला आहे.
रविवारची सुट्टी नाकारल्याने वाद वाढला
१ जुलै रोजी अशिया यांनी रुग्णालयाकडे दर रविवारी सुट्टी देण्याची मागणी केली होती. मात्र, रुग्णालय हे २४ तास आपत्कालीन सेवा देणारे ठिकाण असल्याने सर्व प्रशिक्षणार्थींना पाळ्यांनुसार (Shifts) काम करावे लागते, त्यामुळे त्यांची ही मागणी फेटाळण्यात आली. ही मागणी फेटाळल्यानंतर लगेचच अशिया यांनी सोशल मीडियावर वरिष्ठ डॉक्टर्स आणि रुग्णालयाविरोधात छळाचे आरोप करणारी पोस्ट शेअर केली.
महिला डॉक्टरच्या वकिलांचा बचाव
महिला डॉक्टरच्या वकिलांनी न्यायालयात बाजू मांडताना सांगितले की, "कामाच्या ठिकाणी होणारा अन्याय, ठरवून दिलेल्या वेळेपेक्षा जास्त काम करून घेणे याविरोधात आवाज उठवणे आणि शिक्षण मंडळाकडे दाद मागणे म्हणजे मानहानी होत नाही." संविधानाने प्रत्येकाला अभिव्यक्ती स्वातंत्र्य दिले आहे. या डॉक्टरला कोणाची बदनामी करायची नसून, केवळ सन्मानाने तिचे शिक्षण पूर्ण करायचे आहे, असा युक्तिवाद त्यांनी केला.
महिला डॉक्टर निलंबित; मुख्यमंत्र्यांकडे धाव
या वादानंतर रुग्णालय प्रशासनाने अशिया खान यांना निलंबित केले असून रुग्णालयाच्या परिसरात येण्यास बंदी घातली आहे. निलंबनानंतर अशिया यांनी पुन्हा एकदा सोशल मीडियावर महाराष्ट्राचे मुख्यमंत्री, नॅशनल मेडिकल कमिशन आणि शिक्षण मंडळाला टॅग करत पोस्ट केली आहे. अन्यायाविरुद्ध आवाज उठवल्यामुळेच रुग्णालयाने आपल्याला चुकीच्या पद्धतीने बाहेर काढले, असा आरोप त्यांनी केला आहे.
