Nashik : कुंभमेळ्याची कामे १५ दिवस बंद राहणार, नाशिक महापालिकेचा मोठा निर्णय; कारण काय ?

Nashik : २०२७ मध्ये नाशिकमध्ये होणाऱ्या कुंभमेळ्यासाठी नाशिक शहरात मोठ्या प्रमाणात विकासकामे सुरु आहेत. शहरातील २८ प्रमुख रस्त्यांचाही यात समावेश आहे. रस्त्यावर होणारे खोदकाम यामुळे गणेश मंडपांसमोर खड्डे व तत्सम कुठल्याही अडचणी गणेश मंडळासमोर राहणार नाहीत यासाठी कुंभमेळ्याची सुरू असलेली विविध कामे पंधरवड्यासाठी बंद करण्याचे निर्देश महापौर हिमगौरी आहेर-आडके यांनी दिले आहेत.

कुंभमेळ्याची कामे १५ दिवस बंद राहणार

कुंभमेळ्याच्या पार्श्वभूमीवर शहरात कोट्यवधी रुपयांची कामे प्रगतीपथावर आहेत. यामध्ये शहरातील २८ प्रमुख रस्त्यांचाही समावेश आहे. त्यासोबतच इतरही काही कामांसाठी खोदकाम सुरु आहे. अशा परिस्थितीत गणेश मंडळांना अनेक अडचणींना सामोरे जावे लागत आहे. काही मंडळांना मंडप उभारण्यासाठीही जागा राहिली नाही, त्यामुळे त्यांना अन्यत्र स्थलांतर करावे लागले. तर काही मंडपाचा आकारही लहान करावा लागला. खड्डेमय रस्ते व खोदकामाच्या तक्रारी लक्षात घेऊन महापौरांनी गणेशोत्सव आणि पारंपरिक मिरवणूक विनाअडथळा पार पडावी यासाठी प्रशासन, लोकप्रतिनिधी आणि गणेश मंडळांनी समन्वय साधावा, असे आवाहन करण्यात आले आहे. गणेश मंडळांच्या मंडपांसमोरील खड्डे बांधकाम विभागाने युद्धपातळीवर बुजवावेत. शहरात सुरू असलेली विविध कामे गणेशोत्सवाच्या काळात थांबवण्यात यावीत, असेही महापौर हिमगौरी आहेर-आडके यांनी सूचित केले.

सुरक्षिततेच्या नियमांचे पालन करा

सुरक्षिततेच्या नियमांचे पालन करावे. १५ सप्टेंबरपासून आपण स्वतः आयुक्तांसमवेत रस्त्यावर उतरून पाहणी करणार असल्याचे महापौर आहेर यांनी नमूद केले. यावेळी त्यांनी महावितरणला कानपिचक्या देत कामात सुसूत्रता आणावी आणि एक समन्वयक ठेवण्याची सूचना केली. मंडळांकडून मोफत वीजपुरवठ्याची मागणी होत आहे. या संदर्भात मुख्यमंत्र्यांशीही चर्चा केली जाणार असल्याचे त्यांनी सांगितले. तसेच यावेळी सार्वजनिक गणेशोत्सव स्पर्धेत विभागीय स्तरावर एकूण सहा लाखांहून अधिक रुपयांची पारितोषिके देण्याची घोषणा देखील करण्यात आली.