वसई (प्रतिनिधी) : वसई पूर्वेतील वालीव परिसरात घरामागील उघड्या गटारात पडून अवघ्या दोन वर्षांच्या चिमुरड्याचा दुर्दैवी मृत्यू झाल्याची हृदयद्रावक घटना गुरुवारी रात्री घडली. अंकुश शाहदेव तुरिया असे मृत चिमुरड्याचे नाव आहे. मुलगा गटारात पडल्याचे समजताच वडील शाहदेव तुरिया यांनी क्षणाचाही विलंब न करता गटारात उडी मारून त्याला बाहेर काढले. मात्र, गटारातील पाणी नाकातोंडात गेल्याने त्याची प्रकृती गंभीर झाली होती. तातडीने रुग्णालयात दाखल केले असता डॉक्टरांनी त्याला मृत घोषित केले. या घटनेमुळे परिसरात हळहळ व्यक्त होत असून, उघड्या गटारांचा प्रश्न पुन्हा ऐरणीवर आला आहे. वालीव परिसरातील रहिवासी असलेले शाहदेव तुरिया (२७) हे गुरुवारी कामावरून घरी परतले होते. घरी आल्यानंतर ते जेवण करत असताना त्यांनी मुलगा अंकुशला घराबाहेर खेळण्यासाठी पाठवले होते. रात्री सुमारे ११.३५ वाजण्याच्या सुमारास परिसरात अचानक आरडाओरडा सुरू झाला. घरामागील गटारात अंकुश पडल्याचे नागरिकांनी शाहदेव यांना सांगितले.
मुलगा गटारात पडल्याचे कळताच शाहदेव यांनी कोणताही विचार न करता गटारात उडी घेतली आणि अंकुशला बाहेर काढले. मात्र, तोपर्यंत गटारातील पाणी त्याच्या नाकातोंडात गेले होते. मुलाला वाचवण्यासाठी वडिलांनी तातडीने धाव घेतली, परंतु दुर्दैवाने त्यांचे प्रयत्न यशस्वी होऊ शकले नाहीत.अंकुशला तातडीने नालासोपारा पूर्वेतील नागिंदासपाडा येथील वसई-विरार महापालिकेच्या रुग्णालयात नेण्यात आले. तेथे डॉक्टरांनी तपासणी करून त्याला मृत घोषित केले. अवघ्या दोन वर्षांच्या मुलाचा अशा प्रकारे मृत्यू झाल्याने कुटुंबावर दुःखाचा डोंगर कोसळला आहे.दरम्यान,उघड्या गटारांमुळे नागरिकांच्या, विशेषतः लहान मुलांच्या सुरक्षिततेचा प्रश्न पुन्हा ऐरणीवर आला आहे. रहिवासी परिसरातील गटारे उघडी असल्यास अशा दुर्घटना टाळण्यासाठी संबंधित यंत्रणांनी तातडीने उपाययोजना करणे आवश्यक असल्याची भावना या घटनेनंतर व्यक्त होत आहे.