Gardening Tips: घरच्या घरी उगवा ताज्या भाज्या आणि फळं; जाणून घ्या भन्नाट पद्धत

1/6 घरात झाडं लावण्याची इच्छा अनेकांना असते. मात्र, माती घाण होण्याची , मोठ्या कुंड्या ठेवण्याची अडचण आणि जागेची कमतरता यामुळे अनेक जण रोपं लावण्याचा विचार सोडून देतात. तुमच्यासोबतही असं होत का ? तर आता काळजी करण्याची गरज नाही. योग्य पद्धत आणि रोपांची निवड करून तुम्ही मातीशिवायही घरात विविध प्रकारच्या भाज्या, औषधी वनस्पती आणि फळं उगवू शकता. तर नेमकं ती रोपं कोणती जाणून घ्यायचं असेल तर माहिती जरूर वाचा.

2/6 लेट्यूस ही पालेभाजी असून तिचा वापर प्रामुख्याने सॅलड आणि सँडविच तयार करण्यासाठी केला जातो. घरच्या घरी ताजी हिरवी पाने मिळवायची असतील, तर हायड्रोपोनिक पद्धतीने लेट्यूसची लागवड करता येते. योग्य देखभाल आणि अनुकूल परिस्थिती मिळाल्यास या रोपाची पानं काही आठवड्यांत काढण्यायोग्य होऊ शकतात. लेट्यूसला अतिउष्ण हवामान सहसा मानवत नाही. त्यामुळे त्याला योग्य तापमान असलेल्या ठिकाणी ठेवणं आणि पुरेसा प्रकाश मिळेल याची काळजी घेणे  आवश्यक आहे.

3/6 पालक ही अनेकांच्या रोजच्या आहारातील महत्त्वाची भाजी आहे. डाळ, साग, पराठे आणि इतर पदार्थांमध्ये पालकाचा वापर केला जातो. विशेष म्हणजे, हायड्रोपोनिक तंत्रज्ञानाच्या मदतीने पालकही मातीशिवाय उगवता येतो. गरजेनुसार पालकाची पानं काढता येतात. योग्य काळजी आणि अनुकूल परिस्थिती मिळाल्यास रोपाला पुन्हा नवीन पाने फुटू शकतात. घरच्या घरी ताज्या भाज्या उगवण्याची सुरुवात करायची असेल, तर पालक हा एक सोपा पर्याय ठरू शकतो.

4/6 तुळशीचा वापर चहा, विविध खाद्यपदार्थ आणि औषधी उपयोगांसाठी केला जातो. विशेषतः इटालियन आणि भूमध्यसागरीय खाद्यपदार्थांमध्ये तुळशीच्या पानांचा वापर मोठ्या प्रमाणावर होतो. हायड्रोपोनिक शेतीसाठीही तुळस उपयुक्त मानली जाते. तुळशीला उबदार वातावरण आणि पुरेसा प्रकाश आवडतो. वेळोवेळी रोपाच्या वरच्या पानांची आणि टोकांची छाटणी केल्यास त्याची वाढ अधिक दाट होण्यास मदत होऊ शकते. घरात मोठी बाग नसली, तरी योग्य हायड्रोपोनिक व्यवस्था करून कमी जागेत तुळस उगवण्याचा प्रयत्न करता येतो.

5/6 घरात फळं उगवण्यासाठी मोठी जागा आणि मातीने भरलेल्या कुंड्या आवश्यक असतात, असं तुम्हाला वाटत असेल, तर स्ट्रॉबेरी हा एक चांगला पर्याय ठरू शकतो. हायड्रोपोनिक तंत्रज्ञानाच्या मदतीने स्ट्रॉबेरीची लागवडही करता येते. योग्य व्यवस्था असल्यास स्ट्रॉबेरीची रोपं उभ्या म्हणजेच व्हर्टिकल पद्धतीनेही वाढवता येतात. त्यामुळे कमी जागेत अधिक रोपं ठेवणं शक्य होऊ शकतं. या पद्धतीमुळे मातीशी संबंधित काही रोग आणि अस्वच्छतेच्या समस्या कमी होण्यास मदत होऊ शकते.

6/6 टोमॅटोचा वापर जवळपास प्रत्येक घरातील स्वयंपाकात केला जातो. भाजी, चटणी किंवा सॅलड अशा अनेक पदार्थांमध्ये टोमॅटो महत्त्वाची भूमिका बजावतो. चांगली गोष्ट म्हणजे हायड्रोपोनिक पद्धतीने टोमॅटोची लागवडही करता येते. टोमॅटोचं रोप मोठं झाल्यावर त्याला आधार देण्याची गरज भासू शकते. याशिवाय, रोपाची चांगली वाढ होण्यासाठी आणि फळं येण्यासाठी पुरेसा प्रकाश, योग्य पोषक तत्त्वं आणि अनुकूल तापमान आवश्यक आहे. घरात जागा कमी असली, तरी योग्य व्यवस्था आणि नियमित देखभालीच्या मदतीने टोमॅटो उगवण्याचा प्रयत्न करता येऊ शकतो.