Kolkata Stampede: पश्चिम बंगालमधील कोलकाता येथे चोरबागान दुर्गापूजा मंडपात झालेल्या चेंगराचेंगरीप्रकरणी पोलिसांनी आयोजकांसह 7 जणांना अटक केली आहे. शनिवारी संध्याकाळी घडलेल्या या दुर्घटनेत 19 जणांचा मृत्यू झाला असून अनेक भाविक जखमी झाले आहेत. या घटनेनंतर मंडपातील गर्दी नियंत्रण आणि सुरक्षा व्यवस्थेबाबत प्रश्न उपस्थित होत आहेत.
मुंबई (विशेष प्रतिनिधी) : मुंबईचे विद्रूपीकरण रोखण्यासाठी आणि सार्वजनिक ठिकाणी अनधिकृत जाहिरात फलक (होर्डिंग)लावण्याच्या प्रकारांना आळा घालण्यासाठी ...
आयोजकांसह सुरक्षा कर्मचाऱ्यांवर कारवाई
दुर्गापूजा उत्सवाच्या सप्तमीच्या दिवशी, म्हणजेच शनिवारी सायंकाळी सुमारे 7:40 वाजता चोरबागान दुर्गापूजा मंडपात चेंगराचेंगरी झाली. या ठिकाणी मोठ्या संख्येने भाविक दर्शनासाठी आले होते.
या प्रकरणी दुर्गापूजा समितीचे सचिव राज कुमार सेवड आणि उपाध्यक्ष शांतनु दुबे यांच्यासह बांबूची रचना उभारण्याचे काम करणारे बिप्लब मुखर्जी यांना अटक करण्यात आली आहे. तसेच गर्दी नियंत्रणाची जबाबदारी असलेले कौशिक साहा आणि पिंटू डे, तर खासगी सुरक्षा व्यवस्थेशी संबंधित सुमन चक्रवर्ती आणि राजेश पाल यांच्यावरही कारवाई करण्यात आली आहे.
घोषणेमुळे गर्दी वाढल्याचा मुख्यमंत्र्यांचा दावा
पश्चिम बंगालचे मुख्यमंत्री सुवेंदू अधिकारी यांनी प्राथमिक अहवालाचा हवाला देत आयोजकांनी लाऊडस्पीकरवर केलेल्या घोषणेमुळे भाविकांची गर्दी वाढल्याचे सांगितले. कोलकाता मेडिकल कॉलेज आणि रुग्णालयात जखमींची भेट घेतल्यानंतर त्यांनी पत्रकारांशी संवाद साधला.
मंडपात नेमकी कोणती घोषणा करण्यात आली होती, हे अद्याप स्पष्ट झालेले नाही. दरम्यान, दोन मृतांच्या कुटुंबीयांनी खासगी सुरक्षा रक्षकांनी शिट्ट्या वाजवल्यामुळे भाविकांमध्ये गोंधळ निर्माण झाल्याचा दावा केल्याचेही मुख्यमंत्र्यांनी सांगितले.
मंडपांच्या सुरक्षा व्यवस्थेवर भर
या घटनेच्या पार्श्वभूमीवर मुख्यमंत्र्यांनी थीमवर आधारित दुर्गापूजा मंडपांच्या आयोजकांना योग्य प्रकाशव्यवस्था आणि भाविकांच्या येण्या-जाण्यासाठी पुरेशी प्रवेशद्वारे ठेवण्याचे आवाहन केले. उत्सवाच्या सजावटीपेक्षा लोकांचे प्राण अधिक महत्त्वाचे असल्याचे त्यांनी अधोरेखित केले.
चेंगराचेंगरीच्या घटनास्थळाची तपासणी करण्यासाठी न्यायवैद्यक विभाग, पोलीस एसटीएफ आणि अग्निशमन दलाला पाचारण करण्यात आले आहे. दुर्घटनेचे नेमके कारण शोधण्यासाठी तपास सुरू आहे.
अमित शाह यांचे कार्यक्रम पुढे ढकलले
या दुर्घटनेनंतर केंद्रीय गृहमंत्री अमित शाह यांच्यासह संबंधित शासकीय कार्यक्रम पुढे ढकलण्यात आल्याचे मुख्यमंत्र्यांनी सांगितले. शाह शनिवारी संध्याकाळी कोलकाता येथे दाखल झाले होते. रविवारी त्यांचा काही दुर्गापूजा मंडपांना भेट देण्याचा कार्यक्रम होता.
या घटनेमुळे दुर्गापूजा उत्सवादरम्यान गर्दीचे नियोजन, सुरक्षा व्यवस्था आणि आपत्कालीन उपाययोजनांच्या अंमलबजावणीचा मुद्दा ऐरणीवर आला आहे.
