Ramayan: रामायण 'राइज ऑफ अ लिजेंड' रचणार इतिहास! भारतासाठी ठरला अभिमानाचा क्षण

भारतासाठी अभिमानाचा क्षण! भारतीय सिनेमाचा भव्य आविष्कार आणि दिवाळीचा उत्साह आंतरराष्ट्रीय स्तरावर पोहोचवत, नमित मल्होत्रा यांचा ‘रामायण: राइज ऑफ अ लिजेंड’ हा चित्रपट प्रतिष्ठित अकॅडमी म्युझियम ऑफ मोशन पिक्चर्सच्या डेव्हिड गेफेन थिएटरमध्ये वर्ल्ड प्रीमियर होणाऱ्या मोजक्या भारतीय चित्रपटांमध्ये स्थान मिळवणार आहे. या खास सोहळ्याला 945 पाहुणे उपस्थित राहणार आहेत.(RAMAYAN MOVIE)

नमित मल्होत्रा यांची निर्मिती आणि नितेश तिवारी यांचे दिग्दर्शन लाभलेला ‘रामायण’ हा 2026 मधील सर्वाधिक बहुप्रतीक्षित चित्रपटांपैकी एक आहे. चित्रपटाच्या टीझरपासून ट्रेलरपर्यंत, प्रत्येक नव्या झलकसोबत प्रेक्षकांमधील उत्सुकता अधिकच वाढली आहे. चित्रपटाची भव्यता, दमदार कलाकारांची फळी आणि नेत्रदीपक दृश्ये यामुळे हा चित्रपट विशेष ठरतो. मात्र, त्याची सर्वात मोठी ताकद त्यातील भावना आणि मूळ कथेशी असलेली निष्ठा ही आहे. सुरुवातीपासूनच चित्रपटाच्या टीमने या प्रकल्पाकडे केवळ एक चित्रपट म्हणून नव्हे, तर एका पवित्र जबाबदारीच्या भावनेतून पाहिले आहे. चित्रपटसृष्टीत अनेकदा मार्केटिंगच्या दृष्टिकोनातून प्रचाराचे नियोजन केले जाते; मात्र ‘रामायण’च्या बाबतीत भारतीय संस्कृती, परंपरा आणि आध्यात्मिक महत्त्व यांचा सन्मान राखत पुढील वाटचाल केली जात आहे.(ACADEMY MUSEUM OF MOTION PICTURE)

भारतीय संस्कृतीचा हाच गौरव जागतिक व्यासपीठावर पोहोचवत, नमित मल्होत्रा यांचा ‘रामायण: राइज ऑफ अ लिजेंड’ आता हॉलीवूडमध्ये इतिहास घडवण्यासाठी सज्ज झाला आहे. चित्रपटाच्या निर्मात्यांनी अधिकृत घोषणा केली आहे की, या चित्रपटाचा भव्य वर्ल्ड प्रीमियर 27 ऑक्टोबर रोजी संध्याकाळी लॉस एंजेलिसमधील प्रतिष्ठित अकॅडमी म्युझियम ऑफ मोशन पिक्चर्स येथे आयोजित करण्यात येणार आहे.

जगभरात चित्रपटसृष्टीचा इतिहास आणि चित्रपटनिर्मितीतील उत्कृष्टतेसाठी ओळखले जाणारे हे संग्रहालय, जागतिक सिनेमाची कला, तंत्रज्ञान आणि कलाकारांना समर्पित असलेली एक महत्त्वपूर्ण संस्था आहे. गेल्या काही वर्षांत येथे अनेक प्रतिष्ठित आंतरराष्ट्रीय कार्यक्रमांसह ऑस्करशी संबंधित सोहळ्यांचेही आयोजन करण्यात आले आहे. अशा ऐतिहासिक ठिकाणी ‘रामायण: राइज ऑफ अ लिजेंड’चा वर्ल्ड प्रीमियर होणे, ही भारतीय मनोरंजनविश्वासाठी एक मोठी उपलब्धी आहे.

हा केवळ चित्रपटाचा प्रीमियर नसून भारतीय संस्कृती आणि सिनेमासाठी अभिमानाचा क्षण आहे. लॉस एंजेलिसमध्ये भारतीय सिनेमाची जादू आणि दिवाळीचा झगमगाट एकाच वेळी अनुभवायला मिळणार आहे. भारतीय परंपरा आणि वारशाचा सन्मान करण्यासाठी रेड कार्पेटवरही भारतीय संस्कृतीची झलक पाहायला मिळणार आहे. दिवाळीचे रंग आणि उत्साह हॉलीवूडपर्यंत पोहोचवण्यासाठी निर्मात्यांनी पाहुण्यांना पारंपरिक भारतीय सणाच्या पोशाखात उपस्थित राहण्याचे आवाहन केले आहे.

या खास प्रीमियर सोहळ्याला 945 पाहुणे उपस्थित राहणार आहेत. यामध्ये हॉलीवूडमधील नामवंत व्यक्तिमत्त्वे, चित्रपट निर्माते, आंतरराष्ट्रीय माध्यमांचे प्रतिनिधी आणि चित्रपटसृष्टीतील अनेक दिग्गजांचा समावेश असेल. त्यामुळे हा सोहळा जागतिक सिनेमाच्या इतिहासातील एक अविस्मरणीय संध्याकाळ ठरणार आहे.

चित्रपटाचा प्रीमियर आणखी खास बनवण्यासाठी त्याचे प्रदर्शन 3डी तंत्रज्ञानात केले जाणार आहे. यामुळे चित्रपटातील दृश्ये, त्यांची खोली आणि भव्यता यांचा अनुभव अधिक प्रभावीपणे घेता येणार आहे. 3डी तंत्रज्ञानामुळे प्रेक्षकांना चित्रपटाच्या विश्वाचा अधिक जवळून अनुभव घेता येईल, ज्यामुळे प्रत्येक दृश्य, प्रत्येक नजारा आणि प्रत्येक भावना अधिक जिवंत भासेल. लॉस एंजेलिसमधील प्रीमियरला उपस्थित राहणाऱ्या जवळपास सर्वच पाहुण्यांनी चित्रपटाचा संपूर्ण अनुभव घेण्यासाठी 3डी स्क्रीनिंगला पसंती दिली आहे.

चित्रपटाची कथा आणि त्यातील भव्य दृश्ये अधिक प्रभावीपणे सादर करण्यासाठी 3डी तंत्रज्ञान महत्त्वपूर्ण ठरणार असल्याने, निर्माते भारतासह जगभरातील प्रेक्षकांनाही हा चित्रपट 3डीमध्ये पाहण्याचा सल्ला देत आहेत. चित्रपटाचे जगभरातील ॲडव्हान्स बुकिंग 20 ऑक्टोबरपासून सुरू होणार आहे.

नितेश तिवारी यांच्या दिग्दर्शनाखाली साकारत असलेल्या ‘रामायण’ची निर्मिती नमित मल्होत्रा यांच्या प्राइम फोकस स्टुडिओजने आठ ऑस्कर पुरस्कार जिंकलेल्या डीएनईजी आणि यश यांच्या मॉन्स्टर माइंड क्रिएशन्स यांच्या सहकार्याने केली आहे. हा चित्रपट दोन भागांमध्ये प्रदर्शित होणार आहे.

चित्रपटाचा पहिला भाग 5 नोव्हेंबर 2026 रोजी जगभरात प्रदर्शित होईल, तर दुसरा भाग दिवाळी 2027 मध्ये प्रेक्षकांच्या भेटीला येणार आहे. भारतात हा चित्रपट हिंदी, तमिळ, तेलुगू, कन्नड आणि मल्याळम या भाषांमध्ये प्रदर्शित केला जाणार आहे. तसेच, हा चित्रपट आयमॅक्समध्येही पाहता येणार आहे. भारत वगळता जगभरातील वितरणाची जबाबदारी सोनी पिक्चर्स सांभाळणार असून, हिंदी भाषिक बाजारपेठेत धर्मा प्रॉडक्शन्स या चित्रपटाचे वितरण करणार आहे.