ठाणे : महाराष्ट्रातील दुष्काळग्रस्त शेतकऱ्यांना दिलासा देण्यासाठी राज्य सरकार आणि शिवसेनेच्या माध्यमातून मदतीचा दुहेरी उपक्रम राबविण्यात येत आहे. सरकारकडून शेतकऱ्यांच्या खात्यात आर्थिक मदत जमा केली जात असताना, शिवसेनेच्या वतीने दिवाळीचा शिधा थेट शेतकऱ्यांच्या घरापर्यंत पोहोचविण्यात येणार आहे. याच उपक्रमांतर्गत उपमुख्यमंत्री एकनाथ शिंदे यांच्या ठाण्यातील शुभदीप बंगल्यावरून मदत साहित्याने भरलेले ट्रक दुष्काळग्रस्त भागांकडे रवाना करण्यात आले.
दुष्काळग्रस्त शेतकऱ्यांना सरकार आणि शिवसेनेचा मदतीचा हात
महाराष्ट्रातील शेतकरी दुष्काळामुळे संकटात सापडले आहेत. गेल्या वर्षी अतिवृष्टीमुळे शेतीचे नुकसान झाले, तर यंदा पावसाअभावी पिके करपली आहेत. अशा परिस्थितीत शेतकऱ्यांना आर्थिक मदतीसोबतच दैनंदिन गरजांसाठी आवश्यक साहित्य उपलब्ध करून देण्याचा निर्णय घेण्यात आला आहे. ठाण्यातून मदत साहित्याचे ट्रक रवाना करताना उपमुख्यमंत्री एकनाथ शिंदे यांनी शेतकऱ्यांना दिलासा देण्याची भूमिका स्पष्ट केली. सरकारकडून आर्थिक मदत आणि शिवसेनेच्या माध्यमातून दिवाळीचा शिधा अशा दोन्ही मार्गांनी मदत केली जाणार असल्याचे त्यांनी सांगितले.
या कार्यक्रमाला परिवहन मंत्री प्रताप सरनाईक, खासदार नरेश म्हस्के, आमदार रवींद्र फाटक, महापौर शर्मिला पिंपळोलकर, शिवसेना सचिव राम रेपाळे, सभागृह नेते हनुमंत जगदाळे, गटनेते पवन कदम, राज्य संघटन प्रमुख आनंद परांजपे, प्रवक्ते राहुल लोंढे यांच्यासह पक्षाचे पदाधिकारी आणि कार्यकर्ते उपस्थित होते.
‘शेतकऱ्यांची दिवाळी काळी होऊ देणार नाही’
दसऱ्यानिमित्त नागरिक, पत्रकार आणि शेतकरी बांधवांना शुभेच्छा देताना एकनाथ शिंदे यांनी शेतकऱ्यांना मदतीचे आश्वासन दिले. “शेतकऱ्यांची दिवाळी आम्ही काळी होऊ देणार नाही,” असा विश्वास त्यांनी व्यक्त केला. मुख्यमंत्री, मंत्रिमंडळातील सहकारी, आमदार आणि खासदार यांनी दुष्काळग्रस्त भागांत जाऊन शेतकऱ्यांच्या समस्या जाणून घेतल्याचे त्यांनी सांगितले. राज्यात दुष्काळ जाहीर करण्याची मागणी मान्य करण्यात आली असून, शेतकऱ्यांना मदत देताना सरकार हात आखडता घेणार नसल्याचेही त्यांनी स्पष्ट केले.
शेतकऱ्यांच्या खात्यांमध्ये पाच हजार रुपयांची मदत जमा केली जात असल्याचा उल्लेख करताना त्यांनी शेतीच्या नुकसानीमुळे कुटुंबांसमोर उभ्या राहिलेल्या अडचणींचाही संदर्भ दिला. मुलांचे शिक्षण, मुलींची लग्ने आणि कुटुंबाचा उदरनिर्वाह यांसारख्या प्रश्नांवर सरकार गंभीर असल्याचे त्यांनी सांगितले. केंद्र सरकार आणि पंतप्रधान नरेंद्र मोदी यांचाही शेतकऱ्यांना पाठिंबा असल्याचे शिंदे यांनी नमूद केले.
RSS Vijayadashami Utsav 2026 : राष्ट्रीय स्वयंसेवक संघाच्या (RSS) शताब्दी वर्षानिमित्त नागपुरात आयोजित विजयादशमी उत्सव आणि शस्त्रपूजन सोहळ्यात सरसंघचालक डॉ. मोहन भागवत ...
दिवाळीचा शिधा थेट शेतकऱ्यांच्या घरापर्यंत
शिवसेनेच्या वतीने दिवाळीचा शिधा भरलेले शेकडो ट्रक टप्प्याटप्प्याने दुष्काळग्रस्त भागांत पाठविण्यात येणार आहेत. पक्षाचे कार्यकर्ते शेतकऱ्यांच्या बांधावर जाऊन तसेच त्यांच्या घरापर्यंत पोहोचून मदत साहित्याचे वितरण करणार आहेत. या उपक्रमामागील भूमिका स्पष्ट करताना शिंदे यांनी शिवसेनेच्या सामाजिक कार्याचा उल्लेख केला. “मदतीचे तोरण हे शिवसेनेचे धोरण आहे,” असे सांगत संकटाच्या काळात शेतकऱ्यांच्या पाठीशी उभे राहण्याची भूमिका त्यांनी मांडली. बाळासाहेब ठाकरे आणि आनंद दिघे यांच्या विचारांचा वारसा पुढे नेण्याचा प्रयत्न पक्षाकडून केला जात असल्याचेही त्यांनी सांगितले.
दुष्काळग्रस्त शेतकऱ्यांच्या मुलींच्या लग्नाची जबाबदारी घेणार
दुष्काळामुळे आर्थिक अडचणीत सापडलेल्या शेतकरी कुटुंबांना मदत करण्यासाठी शिवसेनेने आणखी एक महत्त्वाचा निर्णय जाहीर केला आहे. संकटग्रस्त शेतकऱ्यांच्या मुलींच्या लग्नासाठी मदत करण्याची जबाबदारी पक्षाच्या माध्यमातून उचलली जाणार असल्याचे एकनाथ शिंदे यांनी सांगितले.यासाठी आमदार, जिल्हाप्रमुख आणि तालुकाप्रमुखांना अशा कुटुंबांची माहिती संकलित करण्याच्या सूचना देण्यात आल्या आहेत. दसरा मेळाव्यातूनही मदत साहित्याने भरलेले ट्रक दुष्काळग्रस्त भागांकडे रवाना केले जाणार असल्याचे त्यांनी स्पष्ट केले. “८० टक्के समाजकारण आणि २० टक्के राजकारण” या भूमिकेतून हा उपक्रम राबविण्यात येत असल्याचे सांगत, दुष्काळाच्या संकटात शेतकऱ्यांना एकटे सोडले जाणार नाही, असा विश्वास शिंदे यांनी व्यक्त केला.
नवरात्रोत्सवातूनही शेतकऱ्यांना मदत
नवरात्रोत्सवादरम्यान खासदार डॉ. श्रीकांत शिंदे यांनी साधेपणाने उत्सव साजरा करत परंपरा आणि संस्कृती जपण्याचा प्रयत्न केला. त्याचबरोबर उत्सवाच्या माध्यमातून शेतकऱ्यांना मदत करण्याचे कामही करण्यात आल्याचे उपमुख्यमंत्री एकनाथ शिंदे यांनी सांगितले. सण-उत्सव साजरे करताना सामाजिक बांधिलकी जपणे आणि संकटात सापडलेल्या कुटुंबांना मदतीचा हात देणे, हा या उपक्रमाचा उद्देश असल्याचे त्यांनी स्पष्ट केले.
पत्रकाराला मारहाणीच्या घटनेवरही शिंदेंची प्रतिक्रिया
दरम्यान, ठाण्याच्या महापौरांच्या चालकाकडून एका पत्रकाराला मारहाण झाल्याच्या घटनेबाबतही एकनाथ शिंदे यांनी प्रतिक्रिया दिली. पत्रकाराला मारहाण करणे अत्यंत चुकीचे असल्याचे त्यांनी स्पष्ट केले. पत्रकारांच्या पाठीशी आपण नेहमीच उभे राहिलो आहोत, असे सांगत संबंधित व्यक्तीकडून काही चूक झाली असल्यास तिची चौकशी करून योग्य कारवाई केली जाईल, असे आश्वासन त्यांनी दिले. दुष्काळग्रस्त शेतकऱ्यांना आर्थिक मदत, दिवाळीचा शिधा आणि संकटग्रस्त कुटुंबांना आधार देण्याच्या माध्यमातून मदतीचे प्रयत्न सुरू असल्याचे या कार्यक्रमातून अधोरेखित झाले.