नागोया : जपानमध्ये सुरू असलेल्या आशियाई पॅरा गेम्सदरम्यान भारतीय पथकाशी संबंधित एक गंभीर प्रकरण समोर आले आहे. भारतीय पॅरा जलतरणपटू मोहम्मद शम्स आलम शेख याच्यावर हॉटेलमधील महिला कर्मचाऱ्याचा लैंगिक छळ आणि गैरवर्तन केल्याचा आरोप करण्यात आला आहे. या प्रकरणी जपानी पोलिसांनी त्याला ताब्यात घेतल्याचे वृत्त असून, घटनेनंतर दुसऱ्याच दिवशी त्याला भारतात परत पाठवण्यात आले आहे. दरम्यान, या प्रकरणाची गंभीर दखल घेत भारतीय पॅरालिम्पिक समिती त्याच्यावर आजीवन बंदी घालण्याबाबत विचार करू शकते, अशी माहिती समोर येत आहे.
नागोयातील हॉटेलमध्ये कथित प्रकार
मिळालेल्या माहितीनुसार, ही कथित घटना सोमवारी नागोया येथील फोर पॉइंट्स बाय शेराटन हॉटेलमध्ये घडली. या हॉटेलमध्ये भारतीय पॅरा जलतरण संघाचे खेळाडू वास्तव्यास होते. हाऊसकीपिंगच्या कामासाठी एका महिला कर्मचाऱ्याने खेळाडूच्या खोलीत प्रवेश केला असता तिच्यासोबत गैरवर्तन झाल्याचा आरोप करण्यात आला आहे. भारतीय पथकातील एका वरिष्ठ अधिकाऱ्याने या घटनेला दुजोरा दिल्याचे वृत्त आहे. संबंधित महिला कर्मचाऱ्याने आपल्या वरिष्ठांना माहिती दिल्यानंतर पोलिसांना पाचारण करण्यात आल्याचे सांगण्यात येते.
महिला कर्मचाऱ्याच्या तक्रारीनंतर पोलिसांची कारवाई
वृत्तांनुसार, संबंधित खेळाडूने महिला कर्मचाऱ्याला अयोग्यरीत्या स्पर्श केल्याचा, अश्लील हावभाव केल्याचा आणि तिच्यावर जबरदस्ती करण्याचा प्रयत्न केल्याचा आरोप आहे. या आरोपांनंतर जपानी पोलिसांनी ४० वर्षीय मोहम्मद शम्स आलम शेख याला ताब्यात घेतले. भारतीय पथकातील अधिकाऱ्याच्या दाव्यानुसार, स्थानिक आयोजन समितीने भारतीय पथकाच्या शेफ-डी-मिशन कार्यालयाला या प्रकरणाची माहिती दिली होती.
नागोया (जपान) : जपानमधील आयची-नागोया येथे सुरू असलेल्या एशियन पॅरा गेम्स 2026 मध्ये भारतीय खेळाडूंनी दमदार कामगिरी करत देशाच्या पदकतालिकेत भर घातली आहे. 21 ...
आयोजन समितीच्या हस्तक्षेपानंतर भारतात पाठवले
या प्रकरणी तक्रार दाखल झाल्यानंतर जपानी पोलिसांनी 40 वर्षीय मोहम्मद शम्स आलम शेख याला ताब्यात घेऊन पोलीस ठाण्यात नेले. भारतीय पथकातील अधिकाऱ्याच्या म्हणण्यानुसार, पोलिसांनी त्याच्याविरोधात अटकेची कारवाई आणि न्यायालयीन खटला चालवण्याची मागणी केली होती. यानंतर स्थानिक आयोजन समितीने या प्रकरणात हस्तक्षेप केला. भारतीय पथकाला संबंधित महिला कर्मचाऱ्याची लेखी माफी मागण्यास आणि आरोपी खेळाडूला जपानमधून परत पाठवण्याची व्यवस्था करण्यास सांगण्यात आल्याचा दावा अधिकाऱ्याने केला आहे. त्यानुसार, शेखला रात्रीसाठी दुसऱ्या हॉटेलमध्ये हलवण्यात आले आणि मंगळवारी नागोया येथून भारतात परत पाठवण्यात आले.या संपूर्ण प्रक्रियेदरम्यान भारतीय पथकातील अधिकाऱ्यांना पोलिस आणि हॉटेल प्रशासनाशी चर्चा करावी लागल्याने बराच वेळ खर्च झाल्याचेही संबंधित अधिकाऱ्याने म्हटले आहे.
आजीवन बंदीच्या शक्यतेची चर्चा
या कथित घटनेमुळे भारतीय पथकाची आंतरराष्ट्रीय स्तरावर प्रतिमा मलिन झाल्याचा दावा पथकातील वरिष्ठ अधिकाऱ्याने केला आहे. या प्रकरणाची गंभीर दखल घेत भारतीय पॅरालिम्पिक समिती संबंधित खेळाडूवर कठोर शिस्तभंगाची कारवाई करू शकते. त्याच्यावर आजीवन बंदी घालण्याचाही विचार होण्याची शक्यता आहे.
भारतीय पथकाच्या प्रतिमेवर प्रश्नचिन्ह
आशियाई पॅरा गेम्ससारख्या आंतरराष्ट्रीय क्रीडा स्पर्धेत खेळाडूंच्या कामगिरीसोबतच त्यांचे वर्तन आणि शिस्त यांनाही महत्त्व असते. या कथित प्रकरणामुळे भारतीय पथकातील अधिकाऱ्यांना स्पर्धेतील तयारी आणि खेळाडूंवर लक्ष केंद्रित करण्याऐवजी प्रशासकीय बाबींमध्ये वेळ द्यावा लागल्याचे सांगण्यात आले आहे. या प्रकरणातील आरोपांची अधिकृत चौकशी, संबंधित यंत्रणांची भूमिका आणि भारतीय पॅरालिम्पिक समितीचा अंतिम निर्णय याकडे आता लक्ष लागले आहे.