Simhastha Kumbhmela 2027: सिंहस्थ कुंभमेळ्याच्या ध्वजारोहण सोहळ्याचे राज्यपालांना निमंत्रण

1/5 नाशिक- त्र्यंबकेश्वर मध्ये 31 ऑक्टोबर रोजी राष्ट्रपती महोदयांच्या प्रमुख उपस्थितीत संपन्न होणाऱ्या सिंहस्थ कुंभमेळ्याच्या ध्वजारोहण सोहळ्यास उपस्थित राहण्याचे निमंत्रण कुंभमेळा मंत्री तथा राज्याचे जलसंपदा व आपत्ती व्यवस्थापन मंत्री तथा नाशिक जिल्ह्याचे पालकमंत्री गिरीश महाजन यांनी आज महाराष्ट्राचे राज्यपाल जिष्णु देव वर्मा यांना दिले.

2/5 यावेळी मंत्री महाजन यांनी सिंहस्थ कुंभमेळ्याच्या पार्श्वभूमीवर सुरू असलेल्या तयारीची तसेच या ऐतिहासिक आणि आध्यात्मिक महत्त्व असलेल्या सोहळ्याच्या नियोजनाची माहिती राज्यपालांना दिली. नाशिक आणि त्र्यंबकेश्वर ही धार्मिक व सांस्कृतिक परंपरेची महत्त्वपूर्ण केंद्रे असून, सिंहस्थ कुंभमेळा हा महाराष्ट्राच्या आध्यात्मिक वैभवाचे दर्शन घडविणारा महत्त्वाचा उत्सव आहे. या सोहळ्याच्या माध्यमातून देशभरातील संत- महंत, साधू आणि भाविकांच्या श्रद्धेला एकत्रित व्यासपीठ मिळणार आहे.

3/5 सिंहस्थ कुंभमेळ्याचे आयोजन भव्य, दिव्य, सुरक्षित आणि सुव्यवस्थित पद्धतीने करण्यासाठी राज्य शासन प्रयत्नशील असून, आवश्यक पायाभूत सुविधा, भाविकांची सोय आणि विविध प्रशासकीय व्यवस्थांच्या नियोजनावर भर देण्यात येत असल्याची माहिती मंत्री महाजन यांनी यावेळी दिली.

4/5 राज्यपालांच्या आधी राष्ट्रपतींनाही सिंहस्थ कुंभमेळ्याचे आमंत्रण देण्यात आले. राष्ट्रपतींना आमंत्रण देण्यासाठी राज्याचे मुख्यमंत्री, दोन्हीही उपमुख्यमंत्री, कुंभमेळा मंत्र्यांसह इतरत्र राज्यातील मंत्री, नाशिक महापालिकेचे महापौर आणि इतरत्र प्रमुख व्यक्ती यावेळी उपस्थित होते.

5/5 यापूर्वी देखील 2015 मध्ये झालेल्या कुंभमेळ्यावेळी सुरक्षित कुंभ कशा पद्धतीने पार पाडला व यशस्वी नियोजन करण्यात आले होते. याबद्दल माहिती राज्यपालांना मंत्री महाजन यांनी माहिती दिली. या भेटीप्रसंगी राज्यपालांचे सचिव डॉ. प्रशांत नारनवरे आणि लोकभवन कार्यालयाचे प्रबंधक निशिकांत देशपांडे उपस्थित होते.