नाशिक : आगामी सिंहस्थ कुंभमेळा २०२७ च्या पार्श्वभूमीवर त्र्यंबकेश्वर येथील श्री त्र्यंबकेश्वर ज्योतिर्लिंग मंदिर परिसरातील पायाभूत सुविधांच्या विकासाला गती मिळणार आहे. मंदिर परिसरातील रस्ता दुरुस्तीच्या प्रस्तावाला राष्ट्रीय स्मारक प्राधिकरणाने मंजुरी दिली आहे. या निर्णयामुळे कुंभमेळ्याच्या काळात येणाऱ्या भाविकांची वाहतूक अधिक सुलभ होण्यास मदत होणार असून, मंदिर परिसरातील सुविधा सुधारण्याच्या दृष्टीने महत्त्वाचे पाऊल उचलण्यात आले आहे.
जिल्हाधिकारी आयुष प्रसाद यांनी यासंदर्भात माहिती दिली. त्र्यंबकेश्वर मंदिर व परिसरातील प्रस्तावित विकासकामांचा आढावा घेण्यासाठी गुरुवारी राष्ट्रीय स्मारक प्राधिकरणाच्या माध्यमातून व्हिडिओ कॉन्फरन्सिंगद्वारे बैठक घेण्यात आली. या बैठकीला नाशिक-त्र्यंबकेश्वर कुंभमेळा प्राधिकरणाचे आयुक्त, नाशिकचे जिल्हाधिकारी, भारतीय पुरातत्त्व सर्वेक्षण विभागाचे अधिकारी तसेच संबंधित वरिष्ठ प्रशासकीय अधिकारी उपस्थित होते.
चार विकासकामांच्या प्रस्तावांचा आढावा
बैठकीदरम्यान मंदिर परिसरातील पायाभूत सुविधांशी संबंधित चार प्रस्तावांवर चर्चा करण्यात आली. यामध्ये रस्ता दुरुस्ती, अत्याधुनिक प्रतीक्षा कक्ष व शौचालयांची उभारणी, आच्छादित मार्ग विकसित करणे तसेच विधी भवन इमारतीची दुरुस्ती व नूतनीकरण या कामांचा समावेश आहे. सविस्तर चर्चेनंतर रस्ता दुरुस्तीच्या प्रस्तावाला तातडीने मंजुरी देण्यात आली. या मंजुरीमुळे संबंधित कामाच्या अंमलबजावणीसाठी पुढील प्रक्रिया सुरू करण्याचा मार्ग मोकळा झाला आहे. नियोजनानुसार रस्त्यांची दुरुस्ती, आवश्यकतेनुसार रुंदीकरण आणि सुशोभीकरणाची कामे हाती घेण्यात येणार आहेत. यामुळे मंदिर परिसरातील वाहतूक व्यवस्थेत सुधारणा होण्यास मदत होईल.
प्रतीक्षा कक्ष, शौचालये आणि आच्छादित मार्गही विकसित होणार
मंदिरात दर्शनासाठी येणाऱ्या भाविकांना अधिक चांगल्या सुविधा उपलब्ध करून देण्यासाठी अत्याधुनिक प्रतीक्षा कक्ष, शौचालये आणि आच्छादित मार्ग उभारण्याच्या प्रस्तावांवरही सकारात्मक चर्चा झाली. यासोबतच विधी भवन इमारतीच्या दुरुस्ती व नूतनीकरणाचे कामही प्रस्तावित आहे. या तीन प्रस्तावांना अंतिम मंजुरी मिळण्यासाठी आवश्यक तांत्रिक कागदपत्रे आणि दस्तऐवज सादर करावे लागणार आहेत. संबंधित कागदपत्रांची पूर्तता झाल्यानंतर पुढील मंजुरीची प्रक्रिया पूर्ण करण्यात येईल, असे राष्ट्रीय स्मारक प्राधिकरणाकडून स्पष्ट करण्यात आले.
कुंभमेळ्यापूर्वी सुविधांच्या विकासावर भर
सिंहस्थ कुंभमेळा २०२७ मध्ये त्र्यंबकेश्वर येथे मोठ्या संख्येने भाविक दाखल होण्याची शक्यता लक्षात घेऊन प्रशासनाकडून विविध विकासकामांचे नियोजन करण्यात येत आहे. भाविकांची गैरसोय टाळणे, सुरक्षित वाहतूक व्यवस्था उपलब्ध करून देणे आणि दर्शनासाठी येणाऱ्या भाविकांना आवश्यक मूलभूत सुविधा पुरवणे, हा या कामांचा प्रमुख उद्देश आहे. मंदिर परिसरातील रस्ता दुरुस्तीला मिळालेली मंजुरी हा या विकास प्रक्रियेतील महत्त्वाचा टप्पा मानला जात आहे. उर्वरित तीन प्रस्तावांनाही अंतिम मंजुरी मिळाल्यानंतर त्र्यंबकेश्वर मंदिर परिसरातील पायाभूत सुविधांच्या विकासाला अधिक गती मिळण्याची अपेक्षा जिल्हाधिकारी आयुष प्रसाद यांनी व्यक्त केली.