Pune News: पुणे-लोणावळा उपनगरीय रेल्वे मार्गावरून प्रवास करणाऱ्या प्रवाशांसाठी महत्त्वाची बातमी आहे. रविवार, 25 ऑक्टोबर रोजी मध्य रेल्वेच्या पुणे विभागाकडून रेल्वे मार्गावर पायाभूत सुविधांची कामे करण्यात येणार आहेत. देहू रोड आणि बेगडेवाडी स्थानकांदरम्यान पादचारी भुयारी मार्गाच्या बांधकामासाठी सकाळी 11:40 ते दुपारी 3:40 या वेळेत चार तासांचा ब्लॉक घेण्यात येणार आहे. त्यामुळे 4 लोकल गाड्या रद्द करण्यात आल्या असून 2 एक्सप्रेस गाड्यांच्या वेळापत्रकातही बदल करण्यात आला आहे.
देहू रोड-बेगडेवाडी दरम्यान काम
देहू रोड आणि बेगडेवाडी स्थानकांदरम्यान पादचाऱ्यांना सुरक्षितपणे रेल्वे मार्ग ओलांडता यावा, यासाठी भुयारी मार्गाचे बांधकाम करण्यात येत आहे. या कामासाठी आरएच गर्डर पद्धतीने प्रबलित सिमेंट काँक्रीटचे (आरसीसी) सेगमेंटल बॉक्स बसवण्यात येणार आहेत. यासाठी अप आणि डाउन अशा दोन्ही मार्गांवर ब्लॉक घेण्यात येईल. या कामाचा परिणाम उपनगरीय लोकल आणि लांब पल्ल्याच्या गाड्यांवर होणार आहे.
पुणे-लोणावळा मार्गावरील 4 लोकल रद्द
ब्लॉकमुळे रविवारी खालील लोकल गाड्या रद्द राहतील.
- 99814: पुणे-लोणावळा लोकल
- 99818: पुणे-लोणावळा लोकल
- 99813: लोणावळा-पुणे लोकल
- 99817: लोणावळा-शिवाजीनगर लोकल
या गाड्या रद्द झाल्यामुळे पुणे, लोणावळा आणि मधल्या स्थानकांदरम्यान प्रवास करणाऱ्या प्रवाशांनी पर्यायी प्रवासाचे नियोजन करावे.
दोन एक्सप्रेस गाड्यांच्या वेळापत्रकात बदल
रेल्वेच्या पायाभूत सुविधांच्या कामाचा परिणाम दोन एक्सप्रेस गाड्यांवरही होणार आहे.
1. गाडी क्रमांक 12164 – चेन्नई सेंट्रल-मुंबई एलटीटी एक्सप्रेस: 24 ऑक्टोबर रोजी प्रवास सुरू केलेली ही गाडी सोलापूर-पुणे विभागात सुमारे साडेतीन तास थांबवून ठेवण्यात येणार आहे.
2. गाडी क्रमांक 11029 – सीएसएमटी मुंबई-कोल्हापूर एक्सप्रेस: 25 ऑक्टोबर रोजी ही गाडी नियोजित वेळेनुसार सकाळी 8:40 वाजता सुटण्याऐवजी दुपारी 12:10 वाजता सुटेल. त्यामुळे गाडीच्या सुटण्याच्या वेळेत साडेतीन तासांचा बदल होणार आहे.
प्रवाशांना रेल्वे प्रशासनाचे आवाहन
रेल्वे प्रशासनाने प्रवाशांना प्रवासाला निघण्यापूर्वी संबंधित गाड्यांचे वेळापत्रक आणि सद्यस्थिती तपासण्याचे आवाहन केले आहे. यासाठी रेल्वेचे चौकशी पोर्टल किंवा नॅशनल ट्रेन एन्क्वायरी सिस्टीम (NTES) ॲपचा वापर करता येईल.
पादचाऱ्यांची सुरक्षितता आणि रेल्वे परिचालन अधिक सुरक्षित करण्यासाठी ही कामे करण्यात येत आहेत. त्यामुळे प्रवाशांनी ब्लॉकची वेळ लक्षात घेऊन प्रवासाचे नियोजन करावे.
