मोगादिशू: सोमालियाची राजधानी मोगादिशूमधून एक मोठी आणि खळबळजनक बातमी समोर आली आहे. अल-कायदाशी संबंधित असलेल्या 'अल-शबाब' या कुख्यात दहशतवादी संघटनेने दक्षिण सोमालियातील जामिका गावाजवळ सोमालियाच्या लष्करी ताफ्यावर अचानक भीषण हल्ला केला. या रक्तरंजित हल्ल्यात किमान 20 सैनिकांचा मृत्यू झाल्याची माहिती समोर आली आहे. हल्ल्यातून बचावलेल्या एका लष्करी अधिकाऱ्याने याला दुजोरा दिला असून, अनेक तास चाललेल्या या संघर्षाने परिसरात दहशत पसरवली आहे.
सोमालिया सरकारच्या संरक्षण मंत्रालयाने दिलेल्या अधिकृत माहितीनुसार, या तीव्र चकमकीत लष्कराच्या जवानांनी जोरदार प्रत्युत्तर देत सुमारे 75 दहशतवाद्यांना कंठस्नान घातले, तर 56 हून अधिक दहशतवादी जखमी झाले आहेत. मात्र, दुसरीकडे अल-शबाब संघटनेने एक अत्यंत खळबळजनक दावा केला आहे. या हल्ल्यात तब्बल 321 सैनिकांना ठार मारल्याचा दावा या संघटनेने केला असून, काही सैनिकांना बंदी बनवून लष्करी उपकरणे देखील ताब्यात घेतल्याचे म्हटले आहे. मात्र, या अतिशयोक्तीपूर्ण दाव्यांची अद्याप कोणतीही स्वतंत्र पुष्टी झालेली नाही.
माद्रिद : स्पेनच्या मध्यवर्ती भागात एका अत्यंत भीषण रेल्वे दुर्घटनेत किमान ४६ लोकांचा मृत्यू झाल्याची अतिशय दुःखद बातमी समोर आली आहे. स्पेनच्या ...
लष्करी ताफ्यासोबत प्रवास करणारे अधिकारी अब्शीर अब्दिकरीम यांनी दिलेल्या माहितीनुसार, सैनिक लीगो येथून प्रवास करत बे प्रदेशातील बुर्हाकाबा जिल्ह्यातील जामिका येथे पोहोचले होते, जिथे त्यांच्यावर हा घातपात करण्यात आला. हल्ल्यानंतर त्यांनी स्वतः आपल्या किमान 20 सहकाऱ्यांचे मृतदेह पाहिल्याचे सांगितले. बेपत्ता झालेल्या काही सैनिकांचा शोध सुरू असून काही सैनिक बालेडोग्ले येथे सुखरूप पोहोचले आहेत.
संरक्षण मंत्रालयाने लष्करी वाहनांचे नुकसान झाल्याचे मान्य केले असून, दहशतवाद्यांनी हा हल्ला करण्यासाठी स्फोटकांनी भरलेल्या वाहनांचा वापर केल्याचे स्पष्ट केले आहे. उल्लेखनीय आहे की, आफ्रिकन संघाच्या सैन्याने 2011 मध्ये अल-शबाबला राजधानी मोगादिशूमधून हुसकावून लावले होते, परंतु ही संघटना अजूनही गनिमी कावा आणि आत्मघाती हल्ल्यांच्या माध्यमातून आपले अस्तित्व टिकवून आहे. या ताज्या हल्ल्यामुळे सोमालियाच्या सुरक्षेचा प्रश्न पुन्हा एकदा ऐरणीवर आला आहे.