नाशिक कुंभमेळ्याचं काय आहे वेगळेपण?
देशातील चार ठिकाणी कुंभमेळ्याचं आयोजन केलं जातं. पण नाशिकमधील सिंहस्थ कुंभमेळा थोडा वेगळा असतो. कारण नाशिकच्या रामकुंड आणि त्र्यंबकेश्वरमधील कुशावर्त येथे अमृतस्नान होतं. वैष्णव आखाडे प्रभू रामांच्या वनवास स्थळ असलेल्या पंचवटीच्या नाशिकमधील रामकुंडातील गोदावरीच्या पवित्र पात्रात अमृतस्नान करतील. तर शैव आखाडे त्र्यंबकेश्वर अर्थात शिवनगरीतील गोदावरी नदी उगम पावलेल्या कुशावर्त कुंडात अमृतस्नान करतील.
मुख्यमंत्री देवेंद्र फडणवीस यांच्याकडून रामतीर्थ येथे सिंहस्थ महाकुंभमेळा ध्वजारोहण सोहळ्याच्या पूर्वतयारीची पाहणी
गोदावरीच्या पवित्र तीरावर शनिवार, दि. ३१ ऑक्टोबर रोजी नाशिक-त्र्यंबकेश्वर सिंहस्थ कुंभमेळ्याच्या ध्वजारोहण सोहळ्याचा मंगलमय शुभारंभ होणार आहे. या ऐतिहासिक सोहळ्याच्या पूर्वतयारीचा आढावा घेण्यासाठी मुख्यमंत्री देवेंद्र फडणवीस यांनी आज रात्री रामतीर्थ परिसरास भेट देऊन प्रत्यक्ष पाहणी केली.
नाशिक कुंभमेळा 21 महिने असणार
नाशिक सिंहस्थ कुंभमेळा यावेळी 21 महिन्यांचा असणार आहे. कुंभमेळ्याची सुरूवात 31 ऑक्टोबर 2026 पासून होईल आणि त्याची सांगता 24 जुलै 2028 रोजी होणार आहे. जवळपास दोन वर्षे हा सोहळा चालणार आहे.
नाशिक कुंभमेळा ध्वजारोहण
नाशिकच्या सिंहस्थ कुंभमेळ्यासाठी ध्वजारोहण दोन स्थानी केलं जातं. नाशिकच्या रामकुंड घाट आणि त्र्यंबकेश्वरच्या कुशावर्त कुंडाजवळ ध्वजारोहण होते. त्यासाठी या ठिकाणी भव्य कार्यक्रमाचं आयोजन केलं आहे. 31 ऑक्टोबर 2026 रोजी दुपारी 12 वाजून 2 मिनिटांनी नाशिकच्या रामकुंड आणि त्र्यंबकेश्वरच्या कुशावर्त येथे एकाच वेळी ध्वजारोहण केलं जाणार आहे.