Diwali 2026: दिवाळीत तुम्ही भेसळयुक्त मिठाई तर नाही खात आहात ना? मिठाई खरेदी 'या' गोष्टी एकदा नक्की तपासा

Diwali 2026: दिवाळीचा सण म्हणजे रोषणाई, फराळ, मिठाई, फटाके. फराळासोबतच मिठाईचीही रेलचेल आपल्या प्रत्येकाच्या घरी असते. काजू कतली, लाडू, बर्फी, पेढे अशा विविध मिठाईंची देवाणघेवाण आपण दिवाळीत मोठ्या प्रमाणात करतो. सणानिमित्त नातेवाईक, मित्रपरिवार आणि ओळखीच्या व्यक्तींकडून मिठाईचे बॉक्स भेट दिली जाते. मात्र, आकर्षक पॅकिंगमध्ये मिळालेली मिठाई शुद्ध घटकांपासून बनवलेली असते का की त्यात भेसळ करण्यात आली आहे, हे ओळखणे इतके सहज शक्य नसते. विशेषतः दुग्धजन्य पदार्थांपासून बनवलेल्या मिठाईमध्ये भेसळीचा धोका उदभवण्याची शक्यता जास्त असते. तसेच गर्दी टाळण्यासाठी, लोक अनेक वेळा बाजारात जाण्याऐवजी ऑनलाइन मिठाई मागवतात. ऑनलाइन मिठाई मागवल्याने तुमचा वेळ वाचतो, पण तुम्ही ऑनलाइन मागवलेल्या मिठाईच्या गुणवत्तेचा कधी विचार केला आहे का? त्यामुळे मिठाई खाण्यापूर्वी तिच्या गुणवत्तेकडे लक्ष देणे अधिक गरजेचे आणि तितकेच महत्वाचे आहे. भारतीय अन्न सुरक्षा आणि मानक प्राधिकरणाने (FSSAI) दिलेल्या माहितीनुसार, काही सामान्य भेसळीचे घटक घरच्या घरी प्राथमिक चाचण्यांद्वारे आपण तपासू शकतो. ते कसे जाणून घेऊ या.

मिठाई खरेदी 'या' गोष्टी एकदा नक्की तपासा

मिठाईच्या पॅकिंगवर उत्पादनाची तारीख आणि वापरण्याची अंतिम तारीख चेक करा. मुदत संपलेली मिठाई खाणे टाळा.

बाजारभावापेक्षा खूपच कमी किमतीत मिळणाऱ्या मिठाईबाबत थोडे सतर्क राहा.

स्वच्छता राखणाऱ्या आणि विश्वासार्ह विक्रेत्यांकडूनच मिठाई खरेदी करा. विशेषतः दूध आणि खव्यापासून बनवलेल्या पदार्थांच्या बाबतीत काळजी घ्या.

ऑनलाईन ऑर्डर करताना दुग्धजन्य मिठाई ज्यात पनीर, खवा, अंडी मावा वापरला आहे, असे पदार्थ मागवणे टाळा. त्याऐवजी काजूकतली, सोन पापडी, म्हैसूर पाक आणि सुक्या मेव्यापासून बनवलेल्या मिठाई ऑनलाइन मागवणे फायदेशीर ठरू शकते.

त्यामुळे दिवाळीत भेट म्हणून मिळालेली मिठाई खाण्यापूर्वी तिचे पॅकिंग, उत्पादनाची तारीख आणि मुदत तपासून घ्या. तसेच मिठाईचा रंग, वास किंवा चव असामान्य वाटत असेल तर ते खाणे टाळा.