Panchkula : हरियाणातील पंचकुला येथील सरकारी शाळेत सहा वर्षीय चिमुरडीवर हल्ला केल्याच्या आरोपाखाली ताब्यात घेण्यात आलेल्या आठ वर्षीय मुलाला किशोर न्याय मंडळाने (JJB) बुधवारी जामीन मंजूर केला. तसेच या घटनेशी संबंधित व्हिडिओ आणि छायाचित्रे सोशल मीडियावरून हटवण्याचे निर्देशही मंडळाने दिले आहेत. पीडित मुलीची ओळख गोपनीय ठेवण्याच्या उद्देशाने हा निर्णय घेण्यात आला.
पीडितेच्या वडिलांच्या याचिकेनंतर सोशल मीडिया पोस्ट हटवण्याचे आदेश
पीडित मुलीच्या वडिलांनी किशोर न्याय (बालकांची काळजी आणि संरक्षण) कायदा 2015 अंतर्गत याचिका दाखल केली होती. घटनेचे व्हिडिओ आणि फोटो सोशल मीडियावर व्हायरल होत असल्याने मुलीची ओळख सुरक्षित ठेवण्यासाठी ते हटवण्याची मागणी करण्यात आली होती.दरम्यान, सुनावणीदरम्यान आरोपी मुलाच्या वडिलांनी जामिनासाठी अर्ज केला. आरोपीचे यापूर्वी कोणतेही गुन्हेगारी रेकॉर्ड नसल्याचे त्याच्या वकिलांनी न्याय मंडळासमोर सांगितले. सतत कोठडीत ठेवल्यास त्याच्या शिक्षणावर, शैक्षणिक प्रगतीवर आणि सर्वांगीण विकासावर विपरीत परिणाम होऊ शकतो, असा युक्तिवाद करण्यात आला.
पालकांकडून समुपदेशन आणि पुनर्वसनाची हमी
आरोपी मुलाला पालकांचे योग्य मार्गदर्शन, समुपदेशन आणि कौटुंबिक सहकार्य दिले जाईल, असे जामीन अर्जात नमूद करण्यात आले होते. त्याला स्वतःच्या कृतीचे गांभीर्य समजावे आणि वर्तनात सुधारणा व्हावी, यासाठी आवश्यक पावले उचलण्याची तयारीही पालकांनी दर्शवली. तसेच संबंधित अधिकाऱ्यांच्या सूचनांनुसार मुलाला समुपदेशनासाठी पाठवून त्याच्या पुनर्वसनासाठी सहकार्य करण्याची हमी पालकांनी दिली.
हैदराबाद : तेलंगणा पोलिसांनी बनावट चलनी नोटा तयार करून त्यांची बाजारात विक्री करण्याचा प्रयत्न करणाऱ्या मोठ्या टोळीचा पर्दाफाश केला आहे. ...
शाळेतील रिकाम्या वर्गात चिमुरडीवर हल्ला
ही घटना 28 ऑक्टोबर रोजी पंचकुलातील एका सरकारी शाळेत घडली होती. शाळेतील रिकाम्या वर्गात तिसरीत शिकणाऱ्या आठ वर्षीय मुलाने बालवर्गात शिकणाऱ्या सहा वर्षीय मुलीवर विटेने हल्ला केल्याचा आरोप आहे. आरोपीने मुलीच्या डोक्यावर अनेक वेळा वार केले. तसेच तिला बाकावरून खाली पाडले, शाळेची टाय पकडून फरफटत नेले आणि लाथा मारल्या. या घटनेचा व्हिडीओ सोशल मीडियावर व्हायरल झाला होता. या हल्ल्यानंतर मुलगी बेशुद्ध पडली होती.
पीजीआय रुग्णालयातून मुलीला डिस्चार्ज
हल्ल्यात मुलीला गंभीर दुखापत झाली होती. तिला तातडीने चंदीगड येथील पीजीआयएमईआर रुग्णालयात दाखल करण्यात आले. उपचारानंतर बुधवारी तिला रुग्णालयातून डिस्चार्ज देण्यात आला. दरम्यान, आरोपी मुलाला शनिवारी किशोर न्याय मंडळासमोर हजर करण्यात आले होते. त्यानंतर त्याला अंबाला येथील बालसुधारगृहात पाठवण्यात आले होते.
घटनेनंतर सरकारकडून पाच सदस्यीय समितीची स्थापना
या घटनेनंतर परिसरात संतापाचे वातावरण निर्माण झाले. प्रकरणाचे गांभीर्य लक्षात घेऊन हरियाणा सरकारने हल्ल्याशी संबंधित परिस्थितीची चौकशी करण्यासाठी पाच सदस्यीय समिती स्थापन केली आहे.याशिवाय राज्यातील सर्व शाळांमधील सुरक्षा व्यवस्थेची व्यापक तपासणी करण्याचे आदेशही सरकारने दिले आहेत. शाळांमधील सुरक्षेतील त्रुटी शोधून आवश्यक उपाययोजना करण्यावर भर दिला जाणार आहे.