वॉशिंग्टन: रशिया आणि युक्रेन दरम्यान गेल्या अनेक वर्षांपासून सुरू असलेले महाभयंकर युद्ध आता अखेर अंतिम टप्प्यात येऊन ठेपल्याची चिन्हे दिसत आहेत. अमेरिकेचे राष्ट्राध्यक्ष डोनाल्ड ट्रम्प यांनी थेट रशियाचे राष्ट्राध्यक्ष व्लादिमीर पुतिन यांचे विशेष दूत किरिल दिमित्रीएव्ह यांची व्हाईट हाऊसमध्ये गुप्त भेट घेतल्याने संपूर्ण जागतिक राजकारणात खळबळ उडाली आहे. या हाय-व्होल्टेज भेटीनंतर खुद्द डोनाल्ड ट्रम्प यांनी रशिया-युक्रेन युद्धाबाबत लवकरच एक 'महा-करार' (Big Deal) होण्याचे मोठे संकेत दिले आहेत. हा प्रस्तावित करार केवळ युक्रेनपुरता मर्यादित नसून, संपूर्ण युरोपच्या सुरक्षेला कलाटणी देणारा ठरणार आहे.
व्हाईट हाऊसच्या ओव्हल ऑफिसमध्ये पत्रकारांशी संवाद साधताना ट्रम्प यांनी रशियन प्रतिनिधीसोबत झालेल्या बैठकीला दुजोरा दिला. मात्र, या चर्चेदरम्यान युक्रेनचा कोणताही प्रतिनिधी उपस्थित नव्हता, हे त्यांनी स्पष्ट केले. हा करार अत्यंत व्यापक स्वरूपाचा असणार असून याद्वारे युरोपमधील अनेक वर्षांपासूनचा तणाव संपुष्टात येईल, असा दावा ट्रम्प प्रशासनाकडून केला जात आहे. विशेष म्हणजे, आपल्या राष्ट्राध्यक्षपदाच्या कार्यकाळाच्या सुरुवातीलाच हे युद्ध लवकरात लवकर थांबवण्याचे आश्वासन ट्रम्प यांनी दिले होते. आता युद्धाने पाचव्या वर्षात प्रवेश केल्यानंतर या दिशेने ठोस पावले उचलली जात आहेत.
तेहरान : अमेरिका आणि इराण यांच्यात गेल्या काही दिवसांपासून तणाव सुरु आहे. या तणावाच्या पार्श्वभूमीवर दोन्ही देशांमध्ये पुन्हा एकदा चर्चेचे प्रयत्न ...
या राजनैतिक घडामोडींना आणखी बळ देण्यासाठी अमेरिकेच्या प्रथम महिला मेलानिया ट्रम्प यांनी व्हाईट हाऊसमध्ये रशिया आणि युक्रेनच्या प्रतिनिधींचे खास स्वागत केले. युक्रेनमध्ये लागू करण्यात आलेल्या अल्पकालीन स्थानिक युद्धविरामाच्या पार्श्वभूमीवर हा सलोख्याचा कार्यक्रम पार पडला, ज्यामध्ये रशियन शिष्टमंडळातील किरिल दिमित्रीएव्ह आवर्जून उपस्थित होते. दुसरीकडे, ब्रुसेल्स येथे अमेरिका, युक्रेन, नाटो आणि युरोपीय मित्रदेशांच्या उच्चस्तरीय बैठका पार पडल्या असून, ट्रम्प यांचे जावई जेरेड कुशनर आणि विशेष दूत स्टीव्ह विटकॉफ या संपूर्ण शांतता प्रक्रियेत अत्यंत महत्त्वाची भूमिका बजावत आहेत.
आता या संपूर्ण मालिकेतील पुढील आणि सर्वात निर्णायक टप्पा संयुक्त अरब अमिरातीतील 'अबू धाबी' येथे पार पडणार आहे. येत्या 10 आणि 11 नोव्हेंबर रोजी रशिया, युक्रेन आणि अमेरिका या तिन्ही देशांची प्रतिनिधीमंडळे अबू धाबी येथे एकाच टेबलवर बसून त्रिपक्षीय चर्चा करणार आहेत. रशियाच्या वतीने पुतिन यांचे अत्यंत विश्वासू सहकारी व्लादिमीर मेदिंस्की या चर्चेचे प्रमुख वार्ताकार असणार आहेत. युद्धानंतरची सुरक्षा व्यवस्था आणि भविष्यात पुन्हा कधीही संघर्ष उद्भवू नये, यासाठी ठोस उपाययोजनांवर या बैठकीत शिक्कामोर्तब होण्याची शक्यता वर्तवली जात आहे. ट्रम्प यांच्या या मास्टरस्ट्रोकमुळे जगभरातील युद्धप्रेमी नागरिकांच्या नजरा आता अबू धाबीमधील ऐतिहासिक बैठकीकडे लागल्या आहेत.