Mohammed Shami: भारतीय क्रिकेट संघाचा अनुभवी वेगवान गोलंदाज मोहम्मद शमी याने कसोटी क्रिकेटमधून निवृत्ती जाहीर केली आहे. 6 नोव्हेंबर 2026 रोजी रात्री उशिरा सोशल मीडियावर भावनिक संदेश शेअर करत त्याने आपल्या निर्णयाची माहिती दिली. मात्र, शमीने क्रिकेटमधून पूर्णपणे निवृत्ती घेतलेली नसून तो मर्यादित षटकांचे क्रिकेट खेळणे सुरू ठेवणार आहे. ( Mohammed Shami)
‘पांढऱ्या जर्सीला निरोप, आठवणी कायम’
शमीने आपल्या पोस्टमध्ये भारतीय कसोटी संघाची पांढरी जर्सी आणि या प्रवासातील आठवणींना निरोप देत असल्याचे म्हटले आहे. पहिल्यांदा भारताची कसोटी जर्सी परिधान केली, तेव्हा देशासाठी काहीतरी करण्याचे स्वप्न होते, असे त्याने सांगितले.
Safed jersey se vida le raha hoon, lekin usse judi yaadon se kabhi nahi… 🇮🇳❤️
Jab pehli baar Bharat ki Test jersey pehni thi, tab sirf ek sapna tha — apne desh ke liye kuch kar dikhane ka..
Uske baad har wicket, har sangharsh, har chot aur har comeback ne mujhe kuch na kuch sikhaya.
Test cricket mere liye sirf ek format nahi, meri zindagi ka ek behad khaas hissa raha hai.
Aaj bhaari dil aur anginat khoobsurat yaadon ke saath main Test cricket se retirement lene ka faisla kar raha hoon.
Is safar mein mera saath dene wale har teammate, coach, family aur un karodon Bharatiyon ka dil se shukriya, jinhone achhe aur mushkil dono waqt mein mujh par bharosa banaye rakha..
BCCI aur Cricket Association of Bengal (CAB) ka bhi dil se shukriya, jinhone mere talent par bharosa kiya, mujhe aage badhne ke mauke diye aur mere cricket ke safar mein ek aham bhoomika nibhayi. Aapka saath aur vishwas mere liye hamesha khaas rahega.
Maidan par meri aakhri Test ball bhale hi fenki ja chuki ho, lekin Bharat ke liye khelne ka garv hamesha mere dil mein zinda rahega.
Shukriya, Test Cricket. ❤️
Aapka Shami 🇮🇳
#Mdshami11 #Mdshami #TestCricket #Retirement
— 𝕸𝖔𝖍𝖆𝖒𝖒𝖆𝖉 𝖘𝖍𝖆𝖒𝖎 (@MdShami11) November 6, 2026
कसोटी क्रिकेट हा केवळ खेळाचा प्रकार नसून आयुष्यातील एक खास भाग असल्याचेही शमीने नमूद केले. या प्रवासात मिळालेल्या प्रत्येक विकेटने, संघर्षाने, दुखापतीने आणि पुनरागमनाने आपल्याला नवे काही शिकवले, अशी भावना त्याने व्यक्त केली.
या प्रवासात साथ देणारे सहकारी, प्रशिक्षक, कुटुंबीय आणि चाहत्यांचे त्याने आभार मानले. तसेच भारतीय क्रिकेट नियामक मंडळ (BCCI) आणि क्रिकेट असोसिएशन ऑफ बंगाल (CAB) यांनी दिलेल्या संधी आणि पाठिंब्याबद्दलही कृतज्ञता व्यक्त केली.
2013 मध्ये कसोटी पदार्पण
उत्तर प्रदेशातील अमरोहा येथे जन्मलेल्या मोहम्मद शमीने बंगालकडून देशांतर्गत क्रिकेट खेळत आपली ओळख निर्माण केली. त्याने 6 नोव्हेंबर 2013 रोजी कोलकात्यातील ईडन गार्डन्स मैदानावर वेस्ट इंडिजविरुद्ध कसोटी पदार्पण केले. त्याच सामन्यात रोहित शर्मानेही कसोटी क्रिकेटमध्ये पदार्पण केले होते.
पदार्पणाच्या सामन्यात शमीने प्रभावी गोलंदाजी करत भारताच्या विजयात महत्त्वाची भूमिका बजावली. पुढील काळात जसप्रीत बुमराह, इशांत शर्मा, उमेश यादव आणि भुवनेश्वर कुमार यांच्यासह त्याने भारतीय वेगवान गोलंदाजी आक्रमणाला बळ दिले. परदेशातील कसोटी मालिकांमध्येही त्याने अनेक महत्त्वपूर्ण कामगिरी केल्या.
अशी राहिली कसोटी कारकीर्द
शमीने भारतासाठी एकूण 64 कसोटी सामने खेळले. या सामन्यांमध्ये त्याने 229 विकेट्स घेतल्या. त्याच्या नावावर 6 वेळा एका डावात 5 विकेट्स घेण्याची कामगिरी आहे. त्याची कसोटीतील गोलंदाजीची सरासरी 27.71 होती, तर सर्वोत्तम कामगिरी 56 धावांत 6 विकेट्स अशी आहे.
2023 मध्ये ऑस्ट्रेलियाविरुद्ध झालेली जागतिक कसोटी अजिंक्यपद स्पर्धेची अंतिम लढत हा शमीचा भारतासाठीचा शेवटचा कसोटी सामना ठरला. दुखापती आणि पुनरागमनाच्या टप्प्यांतून जात त्याने आपल्या कारकिर्दीत अनेक संस्मरणीय कामगिरी केल्या.
एकदिवसीय आणि टी-20 क्रिकेट खेळणार
शमीने केवळ कसोटी क्रिकेटमधून निवृत्ती जाहीर केली आहे. तो एकदिवसीय आणि टी-20 क्रिकेट खेळणे सुरू ठेवणार आहे. त्यामुळे मर्यादित षटकांच्या क्रिकेटमध्ये भारतीय संघात पुनरागमन करण्याची शक्यता कायम आहे. 2027 च्या एकदिवसीय विश्वचषकाच्या पार्श्वभूमीवर त्याच्या पुढील कारकिर्दीकडे क्रिकेट चाहत्यांचे लक्ष असेल.