मुंबई : राज्य शासनाने पूर्व-प्राथमिक ते इयत्ता पहिलीच्या शाळा प्रवेशासाठी बालकांचे किमान वय अधिकृतपणे निश्चित केले आहे. राष्ट्रीय शैक्षणिक धोरण-२०२० मधील तरतुदींनुसार हा निर्णय घेण्यात आला असून, हे वय ३० जून रोजी पूर्ण असणे आवश्यक आहे. नवीन निकष शैक्षणिक वर्ष २०२७-२८ पासून टप्प्याटप्प्याने लागू केले जाणार असून, यासंदर्भातील शासन निर्णय शालेय शिक्षण विभागाने जारी केला आहे.
वयोमर्यादेचे टप्पे आणि वर्षनिहाय अंमलबजावणी
नवीन निर्णयानुसार बालवाटिका-१ (नर्सरी) प्रवेशासाठी तीन वर्षे पूर्ण असण्याचा निकष २०२७-२८ पासून लागू होईल. त्यानंतर बालवाटिका-२ (ज्युनिअर के.जी.) साठी चार वर्षे (२०२८-२९), बालवाटिका-३ (सिनिअर के.जी.) साठी पाच वर्षे (२०२९-३०), तर इयत्ता पहिलीच्या प्रवेशासाठी सहा वर्षे पूर्ण असण्याचा निकष शैक्षणिक वर्ष २०३०-३१ पासून लागू करण्यात येणार आहे.
मागील पद्धती आणि राष्ट्रीय शैक्षणिक धोरणाची अंमलबजावणी
राज्यात यापूर्वी राज्य मंडळासह सीबीएसई, आयसीएसई आणि आयबी शाळांमध्ये पहिलीच्या प्रवेशासाठी वेगवेगळ्या दिनांकांनुसार वयोमर्यादा ग्राह्य धरली जात होती आणि पूर्व-प्राथमिक प्रवेशासाठी कोणतीही निश्चित वयाची अट नव्हती. केंद्र शासनाच्या सूचनेनुसार आणि राष्ट्रीय शैक्षणिक धोरणाच्या पार्श्वभूमीवर आता सर्व शाळांसाठी एकसमान वयाचे निकष स्पष्ट करण्यात आले आहेत.
विद्यमान विद्यार्थ्यांसाठी विशेष सूट आणि सवलती
शैक्षणिक वर्ष २०२६-२७ मधील नर्सरी ते इयत्ता पहिलीच्या विद्यमान विद्यार्थ्यांना हे नवीन वयाचे निकष लागू होणार नाहीत. तसेच, कोणत्याही मान्यताप्राप्त शाळेतून मागील वर्ग उत्तीर्ण झालेल्या नियमित विद्यार्थ्यांना पुढील उच्च वर्गात प्रवेश देताना वयाचे निकष लागू करण्यापासून सूट देण्यात आली आहे. याशिवाय, शाळाप्रमुख स्तरावर किमान व कमाल वयोमर्यादेत १५ दिवसांची विशेष सूट देण्याचे अधिकार राहतील.
मुंबई : प्रभादेवी येथील श्री सिद्धिविनायक गणपती मंदिराला लागून असलेल्या राम मेन्शन सहकारी गृहनिर्माण संस्थेतील 13 निवासी सदनिका आणि सात व्यावसायिक ...
पुढील मार्गदर्शक सूचना
नवीन वयोमर्यादेनुसार विद्यार्थ्यांच्या प्रवेशाबाबतच्या सविस्तर सूचना आणि मार्गदर्शक तत्त्वे शिक्षण संचालक (प्राथमिक), प्राथमिक शिक्षण संचालनालय, पुणे यांच्यामार्फत लवकरच जाहीर केली जाणार आहेत.
