राज ठाकरे यांच्या आईलाही कोरोनाची लागण
मुंबई : महाराष्ट्र नवनिर्माण सेनेचे अध्यक्ष राज ठाकरे यांना कोरोनाची लागण झाली आहे. राज यांच्यासोबत त्यांच्या आईलादेखील कोरोनाची लागण झाली आहे. दोघांनाही सौम्य लक्षणे असल्यामुळे त्यांच्यावर घरीच उपचार करण्यात येत आहेत. या माहितीला मुंबई महापालिकेच्या अधिकाऱ्यांनी दुजोरा दिला आहे.
मनसे अध्यक्ष राज ठाकरे यांची मागील काही दिवसांपासून प्रकृती बिघडली होती. कोरोनासदृश लक्षणे जाणवू लागल्यामुळे त्यांची चाचणी करण्यात आली असता त्यांचा चाचणी अहवाल पॉझिटिव्ह आला आहे. कोरोनाची सौम्य लक्षणे असल्यामुळे त्यांच्यावर घरीच उपचार करण्यात येत आहेत.
कोरोनाच्या लाटेतही राज ठाकरेंनी मास्क वापरला नाही
सध्या महापालिका निवडणुकांच्या पार्श्वभूमीवर राज ठाकरे सक्रिय झाले असून त्यांनी पुणे आणि नाशिक दौरे केले आहेत. गेल्या काही काळात त्यांनी पुण्याला मोठ्या प्रमाणात दौरे केले. फक्त पुणेच नाही तर नाशिकचाही राज ठाकरेंनी दौरा केलेला आहे. विशेष म्हणजे संपूर्ण कोरोनाच्या लाटेतही राज ठाकरेंनी मास्क वापरलेला नाही.