अजितदादांच्या स्वागताचे बॅनर्स लावल्याने उंचावल्या भुवया
मुंबई : राष्ट्रवादी काँग्रेसचे फूट पडल्याच्या घटनेला एक वर्षाहून अधिक काळ लोटला. या काळात अनेकजणांनी उपमुख्यमंत्री अजित पवार यांच्या राष्ट्रवादीत प्रवेश केला. मात्र, बऱ्याच काळापासून पक्ष सोडणार असल्याच्या चर्चा होत असलेले वांद्रे येथील काँग्रेसचे आमदार झिशान बाबा सिद्दीकी यांनी काँग्रेसमध्येच राहणार असल्याचे अनेकदा स्पष्ट केले. आता मात्र, त्यांच्या एका कृतीमुळे सर्वांच्याच भुवया उंचावल्या आहेत. वांद्रे पूर्व येथे अजितदादा आणि त्यांच्या पक्षातील आमदारांच्या स्वागताचे बॅनर्स लावल्यामुळे झिशान सिद्दीकी पक्ष सोडणार असल्याच्या चर्चांना उधाण आले आहे.
काही महिन्यांपूर्वी काँग्रेस पक्षाशी एकनिष्ठ असलेले झिशान सिद्दीकी यांचे वडील बाबा सिद्दीकी यांनी देखील अजितदादांच्या राष्ट्रवादीमध्ये प्रवेश केला. मात्र, त्यानंतरही झिशान सिद्दीकी यांनी काँग्रेस सोडणार नसल्याचे स्पष्ट केले होते. आता मात्र, वांद्रेमध्ये ठिकठिकाणी लावलेल्या बॅनर्समुळे ते अजितदादांना साथ देण्याच्या वाटेवर असल्याची चर्चा आहे.
काँग्रेसने विधानपरिषद निवडणुकीत सात ते आठ आमदारांची मते फुटल्यानतंर त्यांच्यावर कारवाई करण्याचा इशारा दिला होता. मात्र, आजतागायत कोणतीही कारवाई करण्यात आलेली नाही. येणाऱ्या विधानसभा निवडणुकीसाठी त्या आमदारांचे तिकीट कापले जाईल अशी चर्चा राजकीय वर्तुळामध्ये रंगली आहे. यामध्ये झिशान सिद्दिकी यांचा सुद्धा समावेश असल्याची चर्चा आहे.
झिशान सिद्दिकी यांची काँग्रेस युवा शाखेच्या मुंबई विभागाचा अध्यक्ष पदावरून हकालपट्टी
माजी मंत्री बाबा सिद्दिकी यांनी काही महिन्यांपूर्वी काँग्रेस सोडून अजित पवार यांच्या राष्ट्रवादी काँग्रेसमध्ये प्रवेश केला होता. यानंतर झिशान सिद्दिकी यांची काँग्रेस युवा शाखेच्या मुंबई विभागाचा अध्यक्ष पदावरून हकालपट्टी करण्यात आली होती. झिशान यांनी काँग्रेसच्या निर्णयावर कोणतीही अधिकृत सूचना न देता पदावरून हटवण्यात आल्याचा आरोप केला होता. झिशान सिद्दीकी यांच्या जागी युवा संघटनेच्या मुंबई युनिटच्या अध्यक्षपदासाठी अखिलेश यादव यांच्या नावाची घोषणा केली. याआधी ते शहरातील एनएसयूआय या पक्षाची विद्यार्थी शाखा प्रमुख होते.