भुवनेश्वर: भारतीय क्रिकेट संघाचे माजी कर्णधार सौरव गांगुली यांचे मोठे बंधू आणि त्यांची पत्नी मोठ्या दुर्घटनेतून थोडक्यात बचावले आहेत. सौरव गांगुली यांचे मोठे बंधू स्नेहाशीष गांगुली आणि त्यांची पत्नी अर्पिता यांची स्पीडबोट अचानक उलटली. पोलिसांनी ही माहिती सोमवारी दिली. शनिवारी संध्याकाळी लाईटहाऊसच्या जवळ ही घटना घडली. ही घटना ओडिशात घडली असून त्याचा व्हिडीओ समोर आला आहे.
सौरव गांगुली यांचे मोठे बंधू आणि त्यांची पत्नी ओडिशाच्या पुरी समुद्र किनाऱ्यावर फिरायला गेले होते. वॉटर स्पोर्ट्स ऍक्टिव्हिटी सुरु असताना दांपत्याच्या स्पीड बोटचा अपघात झाला. सौरव गांगुलीचा मोठा भाऊ आणि वहिनी अपघातापासून थोडक्यात बचावले. घटनेचा व्हिडीओ समोर आला आहे. त्यात स्पीड बोट उलटलेली दिसत आहे. जीव रक्षकांकडून पर्यटकांना वाचवण्याचे प्रयत्न सुरु आहेत. पर्यटकांचा जीव वाचवण्यासाठी अधिकाऱ्यांनी रबरी फ्लोटचा वापर केला.
'बोटीमध्ये कमी प्रवासी होते. त्यामुळे ती हलकी होती. समुद्र अतिशय उग्र होता. त्यामुळे बोट उलटली. बोटीची क्षमता १० प्रवाशांची होती. पण पैशांच्या लालसेपोटी चालकानं केवळ ३ ते ४ जण चढल्यावरच बोट सोडली. त्या दिवशी समुद्रात जाणारी ती शेवटची बोट होती. समुद्रात जाताना आम्हाला भीती वाटत होती. आम्ही हे बोट चालकाला बोलून दाखवल होत. पण परिस्थिती नियंत्रणात असल्याचं त्यांनी सांगितलं,' अशी माहिती अर्पिता यांनी दिली.
वॉटर स्पोर्ट्स ऍक्टिव्हिटीजसाठी वापरल्या जाणाऱ्या बोटींचा काटेकोरपणे तपासणी करण्याची मागणी अर्पिता गांगुली यांनी केली. 'अधिकाऱ्यांनी या ठिकाणी वॉटर स्पोर्ट्सवर बंदी घालायला हवी. पुरीच्या किनाऱ्यावर समुद्र जास्त खवळलेला आहे. मी कोलकात्यात परत गेल्यावर यासंदर्भात पोलीस अधिक्षक आणि मुख्यमंत्र्यांना पत्र लिहून येथील वॉटर स्पोर्ट्स बंद करण्याची मागणी करणार आहे,' असं अर्पिता यांनी सांगितलं.