देवळा : सोमवारी (दि. २६) रात्री विठेवाडी शिवारात विजेच्या कडकडाट तसेच वादळीवाऱ्यासह जोरदार पाऊस झाला. त्यामुळे अनेक ठिकाणी इलेक्ट्रीक पोल व झाडे उन्मळून पडली आहेत.
विठेवाडी येथील आहेर वस्तीजवळील शेतात बाजीराव राघो निकम यांच्या नवीनच लागवड केलेल्या टोमॅटोच्या शेतात वीज कोसळली. सुदैवाने जीवितहानी झाली नाही. परंतु, एक एकर क्षेत्रातील टोमॅटो रोपाचे नुकसान झाले आहे. त्यातील ३०० ते ३५० लहान रोपे जळून गेली आहेत. तहसील विभागाने तातडीने पंचनामा करून अहवाल पुढील कार्यवाहीसाठी पाठवला.
गेल्या चार - पाच दिवसात मेघ गर्जनेसह झालेल्या अवकाळी पावसामुळे विठेवाडी परिसरात अनेक ठिकाणी इलेक्ट्रीक पोल कोलमडून पडले आहेत. पावसाळ्यापूर्वी एक महिना आधीच प्रत्येक गावात व शिवारात असलेल्या महावितरणच्या विद्युत वाहिनीच्या तारांना अडथळा येऊ नये म्हणून देखभालीसाठी तांत्रिक ठेकेदाराची नियुक्ती करण्यात आली असून देखील विठेवाडी परिसरात अद्याप ठेकेदाराची यंत्रणा पोहोचलेली नाही.
