मुंबई : मुंबईच्या महालक्ष्मी रेसकोर्सवर बीएमसीने कमाईची 'रेस' लावली आहे. जुलै २०२४ पासून मुंबई महापालिकेने ताब्यात घेतलेल्या १२० एकर जमिनीवर इव्हेंट भाडे देऊन तब्बल ७.५ कोटींचा महसूल जमा केला आहे.
या जागेवर मागील वर्षभरात Lollapalooza India, Guns N' Roses चा रॉक शो आणि आंतरराष्ट्रीय अश्वशर्यती यांसारखे भव्य इव्हेंट्स पार पडले. बीएमसीच्या भाडे धोरणानुसार, तीन दिवसांच्या कार्यक्रमासाठी बेस रेट ५० लाख असून, प्रत्येक अतिरिक्त दिवसासाठी १२.५ लाख आकारले जातात.
या संपूर्ण २१२.७ एकर रेसकोर्सपैकी १२०.१ एकर जमीन बीएमसीकडे आहे, तर उर्वरित ९२.६ एकर रॉयल वेस्टर्न इंडिया टर्फ क्लबला २०५३ पर्यंत भाडेपट्ट्याने दिली आहे. ही जमीन ‘न्यूयॉर्कच्या सेंट्रल पार्क’च्या धर्तीवर जागतिक दर्जाच्या सार्वजनिक उद्यानात रूपांतरित करण्याची योजना आहे.
हाफिज कॉन्ट्रॅक्टर यांच्या मार्गदर्शनाखाली सायकल ट्रॅक, वॉकवे, ग्रीन झोन आणि इव्हेंट सादरीकरणासाठी विशेष मोकळी जागा असा हायब्रिड डिझाइन प्लॅन तयार केला जात आहे.
विशेष म्हणजे, या विकासासाठी रिलायन्स इंडस्ट्रीज लिमिटेड (RIL) ला काम सोपवण्याची शक्यता असून, बीएमसीकडून यावर कोणताही खर्च केला जाणार नाही. तसंच, कोस्टल रोड आणि रेसकोर्सच्या मोकळ्या जागा पादचारी सबवेने जोडण्याचं नियोजनही अंतिम टप्प्यात आहे.
मुंबईत मोकळ्या जागेच्या टंचाईत बीएमसीचा हा उपक्रम म्हणजे कमाई आणि सुविधा दोन्ही साधणारा यशस्वी फॉर्म्युला ठरत आहे.