सूत्रांनी दिलेल्या माहितीनुसार ८६ पेक्षा जास्त मृतदेहांची ओळख डीएनए चाचण्यांद्वारे करण्यात आली आहे. याआधी गुजरातचे गृहमंत्री हर्ष संघवी यांनी माजी मुख्यमंत्री विजय रुपाणी यांच्या मृतदेहाची ओळख पटविण्याचे काम डीएनए चाचणीद्वारे पूर्ण केल्याचे जाहीर केले.
राजकोट येथे माजी मुख्यमंत्री विजय रुपाणींचे शासकीय इतमामात अंत्यसंस्कार होणार असल्याचे वृत्त आहे. पण या संदर्भातली सविस्तर माहिती अद्याप जाहीर झालेली नाही.
गुजरातमध्ये सोमवारी शोक
माजी मुख्यमंत्री विजय रुपाणी यांच्या निधनाचे वृत्त आले आहे. अपघातात अर्धवट जळालेल्या मृतदेहांमधून रुपाणींच्या मृतदेहाची ओळख पटविण्याचे काम डीएनए चाचणीद्वारे करण्यात आले आहे. गुजरात सरकारच्यावतीने संपूर्ण गुजरातमध्ये सोमवारी सरकारी शोक पाळला जाईल. राष्ट्रध्वज अर्ध्यावर आणला जाईल. सोमवारी मनोरंजनाच्या कार्यक्रमांचे तसेच सांस्कृतिक कार्यक्रमांचे आयोजन केले जाणार नाही.