मुंबई : मराठी इंडस्ट्रीतील कार्तिकी गायकवाड नावाजलेली गायिका आहे. कार्तिकी गायकवाडने आजवर अनेक गाणी गायली आहेत. ‘सारेगमप लिटिल चॅम्प्स’ या कार्यक्रमाची कार्तिकी विजेती ठरली होती. या कार्यक्रमामुळे खऱ्या अर्थाने ती प्रसिद्धीझोतात आली. गायनासह कार्तिकी सोशल मीडियावरही फार सक्रिय असते. यामार्फत ती तिच्या गायनाच्या कार्यक्रमांचे व्हिडीओ सतत पोस्ट करत असते. अशातच कार्तिकीने नुकताच तिच्या सोशल मीडिया अकाउंटवरून एक व्हिडीओ शेअर केला आहे. तिच्या या व्हिडीओने प्रेक्षकांसह कलाकारांचंही लक्ष वेधलं आहे.
कार्तिकीने इंस्टाग्राम अकाउंटवर तिचा सांगीतिक मैफिलीतला व्हिडीओ शेअर केला आहे. यामध्ये ती गाणं गाताना दिसत आहे, तर यावेळी तिच्यासोबत तिचा मुलगा रिशांक तिच्या मांडीवर बसलेला पाहायला मिळतोय. आई गाणं गात असताना तो शांतपणे ते ऐकत असल्याचं दिसत आहे. कार्तिकीने या व्हिडीओला “रिशांकसोबतची कार्यक्रमाच्या तालमीच्या वेळेची एक गोड आठवण” असं खास कॅप्शन दिलंय.
कार्तिकीने शेअर केलेल्या या गोड व्हिडीओला तिच्या चाहत्यांसह अनेक कलाकारांनीही कमेंट्स करत तिचं कौतुक केलं आहे. या व्हिडीओखाली गायिका मुग्धा वैशंपायनने “अगं कसा गोड बघतोय तो”, असं म्हटलंय तर प्रथमेश लघाटेनेही “क्लास” असं म्हणत कमेंट केली आहे. अभिनेत्री मेघना एरंडेनेही कमेंट करत कार्तिकीच्या बाळाचं कौतुक केलं आहे. यासह एका नेटकऱ्याने “तो बोलत असेल माझी आई किती गोड गाते”, तर दुसऱ्याने “किती गोड दिसतोय आणि शांत बसला आहे”, असं म्हटलं आहे.
कार्तिकीने रोनित पिसेसह डिसेंबर २०२० रोजी लग्न केलं होतं. त्यांनतर कार्तिकीने १४ मे २०२४ रोजी तिला मुलगा झाल्याची गुड न्यूज सोशल मीडियावर पोस्ट करत दिली होती. यापूर्वी तिच्या डोहाळे जेवणाचे फोटो व व्हिडीओ सोशल मीडियावर व्हायरल झाले होते. काही दिवसांपूर्वीच तिने मुलाचा पहिला वाढदिवस साजरा केला होता. अशातच गायिकेच्या भावाचंही नुकतंच लग्न झालं आहे. यावेळी तिने तिच्या भावाच्या लग्नातील अनेक फोटो सोशल मीडियावर पोस्ट केले होते.