अन्यथा ठेकेदाराला कल्याण-डोंबिवलीत फिरू न देण्याचा इशारा
कल्याण : कल्याण-डोंबिवली महानगरपालिकेने घनकचरा विभागात नवीन ठेकेदार नियुक्त केला असून या नव्या ठेकेदाराने जुन्या कंत्राटी कामगारांना न घेता नव्याने कामगार भरती केली आहे. यामुळे ६०० कामगार घरी बसले असून त्यांच्यावर उपासमारीची वेळ आली आहे. याविरोधात महाराष्ट्र नवनिर्माण सेनेच्या वतीने या कंत्राटी कामगारांसह केडीएमसी मुख्यालयावर धडक मोर्चा काढण्यात आला. आधीच्या कंत्राटी कामगारांना कामावर न घेतल्यास सबंधित ठेकेदाराला कल्याण-डोंबिवलीत फिरू न देण्याचा इशारा मनसेचे जिल्हाध्यक्ष उल्हास भोईर यांनी यावेळी दिला.
यावेळी महाराष्ट्र नवनिर्माण महापालिका कामगार कर्मचारी सेना कल्याण डोंबिवली अध्यक्ष उल्हास भोईर, महाराष्ट्र उपाध्यक्ष राजेश उज्जैनकर, कार्याध्यक्ष रोहन आक्केवार, सरचिटणीस कपिल पवार, चिटणीस भिमदास जाधव, गणेश लांडगे, युनिट अध्यक्ष मच्छिंद्र तांदळे, कैलास पारधी, रतन चव्हाण, अविनाश पाटील आदी पदाधिकाऱ्यांसह कामगार मोठ्या संख्येने सहभागी झाले होते.
महानगरपालिकेच्या घनकचरा विभागात सुमारे ३५२ वाहनचालक व ११२० सफाई कामगार सेक्युर वन सिक्युरिटी सर्विसेस मध्ये काम करत होते. त्यानंतर महापालिकेतर्फे सुमित एल्कोप्लास्ट प्रायव्हेट लिमिटेड या कंपनीला ठेका देण्यात आला. महापालिकेच्या धोरणाप्रमाणे कंत्राटदार बदलला तरी कामगार तेच राहतील, याला अनुसरून नवीन कंत्राटदार सुमित एल्कोप्लास्ट प्रायव्हेट लिमिटेड या कंत्राटदाराने या कामगारांपैकी आत्तापर्यंत सुमारे ६०० कामगारांची चाचणी घेऊन त्यापैकी फक्त ३०० कामगारांना सेवेत रुजू करून घेतले व उर्वरित कामगारांना कामावर घेणे अपेक्षित असताना बाह्य यंत्रणेद्वारे कामगारांची भरती चालू केली असून एकप्रकारे कंत्राटदार कामगारांवर अन्याय करत आहे.
सनदशीर मार्गाचा अवलंब म्हणून महाराष्ट्र नवनिर्माण महापालिका कामगार कर्मचारी सेने तर्फे औद्योगिक न्यायालय दावा क्रमांक ५७/२०२५ दावा केला होता. त्यात या नमूद कामगारांच्या यादी पैकी कामगारांना कामावर घेण्याचे आदेश न्यायालयाने सुमित एल्कोप्लास्ट प्रायव्हेट लिमिटेड यांना दिलेले असूनही हा कंत्राटदार औद्योगिक न्यायालयातील यादीतील नावे वगळून बाहेरील कामगारांची भरती करत आहे. याकडे केडीएमसी प्रशासनाचे लक्ष वेधण्यासाठी मनसेच्या वतीने केडीएमसी मुख्यालयावर मोर्चा काढत धडक दिली.