मुंबई: २६/११ मुंबई दहशतवादी हल्ल्याचा सूत्रधार तहव्वुर राणा याने चौकशीदरम्यान अनेक धक्कादायक खुलासे केले आहेत. राष्ट्रीय तपास संस्थेच्या (एनआयए) ताब्यात असलेल्या राणा याची मुंबई गुन्हे शाखेकडून चौकशी सुरू आहे. यामध्ये त्याने अनेक महत्त्वाची माहिती दिली आहे. राणा हा पाकिस्तानी वंशाचा आणि कॅनडाचा रहिवासी आहे. अमेरिकेने एप्रिल २०२५ मध्ये त्याला भारताच्या ताब्यात दिले.
तहव्वुर राणा याने चौकशीदरम्यान माहिती दिली आहे की तो पाकिस्तानी सैन्याचा विश्वासू एजंट होता. तो आखाती युद्धादरम्यान सौदी अरेबियात तैनात होता. राणाने गुन्हे शाखेला सांगितले की माझा साथीदार डेव्हिड कोलमन हेडलीने लष्कर-ए-तोयबासोबत अनेक दहशतवादी प्रशिक्षण शिबिरांमध्ये भाग घेतला होता. तो प्रामुख्याने हेरांच्या नेटवर्कमध्ये काम करत होता. मुंबई पोलिसांच्या गुन्हे शाखेने राणाचा जबाब नोंदवला आहे. राणाने हेडलीला त्याच्या इमिग्रेशन व्यवसायाद्वारे मुंबईत बनावट कार्यालय उघडण्यास मदत केली होती. हल्ल्याचा कट रचण्यासाठी त्या कार्यालयाचा वापर करण्यात आला होता.
एनआयएच्या सूत्रांनुसार, राणाने लष्कर-ए-तोयबा आणि पाकिस्तानची गुप्तचर संस्था आयएसआय यांच्यात खोल संबंध असल्याचे उघड केले आहे. त्याने कबूल केले आहे की २००५ पासून पाकिस्तानी खबऱ्यांच्या मदतीने मुंबई हल्ल्याचा कट रचला जात होता. २६/११ हल्ल्याच्या वेळी तो मुंबईत होता अशी कबुली त्याने दिली आहे. एनआयएने राणाची सखोल चौकशी केली आहे. राणा आणि हेडली यांच्यातील ईमेल पत्रव्यवहार, प्रवास तपशील आणि इतर पुरावे यांचे विश्लेषण केले जात आहे. राणावर गुन्हेगारी कट, खून आणि दहशतवादी कृत्यांचे गंभीर आरोप आहेत.
एनआयएच्या विशेष न्यायालयाने म्हटले आहे की, राणाच्या चौकशीतून हल्ल्यामागील व्यापक कट उघड होऊ शकतो. राणाच्या प्रत्यार्पणामुळे २६/११ च्या हल्ल्यात पाकिस्तानचा सहभाग स्पष्ट होईल. माजी सरकारी वकील उज्ज्वल निकम यांनी विश्वास व्यक्त केला आहे की, मुंबई हल्ल्यात पाकिस्तानचा सहभाग उघड करण्यासाठी त्यांची कबुली महत्त्वाची ठरेल. २६/११ च्या दहशतवादी हल्ल्यात १६६ जणांना आपले प्राण गमवावे लागले.