मुंबई: मनसे अध्यक्ष राज ठाकरे यांच्या घरी गणरायाचे आगमन झाले असून, सकाळपासून अनेक राजकीय लोकांची वर्दळ शिवतीर्थावर पाहायला मिळाली. ज्यामध्ये उबाठा गटातील अनेक बड्या नेत्यांचा समावेश होता. मात्र, यादरम्यान सर्वात जास्त चर्चेचा विषय ठरला तो मुख्यमंत्री देवेंद्र फडणवीस यांची उपस्थिती!मुख्यमंत्र्यांनी आज संध्याकाळी शिवतीर्थावर येत राज ठाकरे यांच्या गणपती बाप्पाचे दर्शन घेतले. त्यापूर्वी उद्धव ठाकरे यांनीही कुटुंबासह शिवतीर्थावर जात राज ठाकरेंच्या गणरायाचे दर्शन घेतले होते. त्यानंतर या दोघांनी काही मिनिटे एकत्र घालवत फोटो देखील काढले.
उद्धव ठाकरे गेल्यानंतर मुख्यमंत्री देवेंद्र फडणवीस यांची शिवतीर्थावर राज ठाकरेसोबतची भेट राजकीय वर्तुळात चर्चेचा विषय ठरली आहे. कारण मुख्यमंत्री फडणवीस आणि मनसे अध्यक्ष राज ठाकरे यांच्यात अलीकडेच एक बैठक झाली होती. त्यानंतर आता गणेश चतुर्थीच्या निमित्ताने ही दोघं पुन्हा एकदा भेटली आहे. राज ठाकरे यांच्या निवासस्थानी दरवर्षी दीड दिवसांचा गणपती असतो. त्यामुळे या दिवसांमध्ये इतरही नेते राज ठाकरेंच्या घरी गणरायाच्या दर्शनाला जाण्याची शक्यता आहे. आजच्या या भेटींमुळे राजकारणावर फारसा प्रभाव पडणार नसला तरी राज्यातील नेते हे राज्याची संस्कृती जपत असल्याचे समोर आले आहे.