कणकवली: माणुसकीला काळिमा फासणारी आणि मन सुन्न करणारी एक घटना कणकवली तालुक्यातील वारगाव, सोरफ-सुतारवाडी येथे घडली आहे. दारूच्या व्यसनाने एका मुलाला इतके हैवान बनवले की, त्याने आपल्या ८० वर्षांच्या वृद्ध आईचा निर्घृण खून केला. या धक्कादायक घटनेने परिसरात शोककळा पसरली आहे.
प्रभावती सोरफ असे मृत महिलेचे नाव असून, त्यांचा मुलगा रवींद्र सोरफ यानेच हा क्रूर प्रकार केल्याचा आरोप आहे. रवींद्रला दारूचे व्यसन असून, रात्रीच्या वेळी आई आणि मुलामध्ये कोणत्यातरी कारणावरून वाद झाला. हा वाद इतका विकोपाला गेला की, संतप्त झालेल्या रवींद्रने थेट कोयता घेऊन आपल्या आईवर वार केले. त्याने डोक्यावर आणि शरीरावर अनेक ठिकाणी वार करत तिला गंभीर जखमी केले. रक्ताच्या थारोळ्यात पडलेल्या आईला त्याने ओढत घरातल्या हॉलमध्ये आणले.
या घटनेची माहिती मिळताच स्थानिकांनी तातडीने कणकवली पोलिसांना कळवले. पोलिसांनी तात्काळ घटनास्थळी धाव घेतली असता, प्रभावती सोरफ यांचा जागीच मृत्यू झाल्याचे आढळून आले. पोलिसांनी आरोपी रवींद्र सोरफ याला जागेवरून ताब्यात घेऊन कणकवली पोलीस ठाण्यात आणले आहे. सध्या त्याची कसून चौकशी सुरू आहे. त्याने दारूच्या नशेत हे कृत्य केले की यामागे आणखी कोणते कारण आहे, याबाबत पोलीस अधिक तपास करत आहेत. या घटनेने संपूर्ण गावात भीतीचे आणि दुःखाचे वातावरण निर्माण झाले आहे.