मुंबई : बॉलिवूड अभिनेता अरबाज खान आणि त्याची पत्नी शूरा खान यांना रविवारी मुलगी झाली. ५८ व्या वर्षी अरबाज दुसऱ्यांदा वडील झाला आहे. शूराला प्रसूतीसाठी शनिवारी मुंबईच्या पी.डी. हिंदुजा रुग्णालयात दाखल करण्यात आले. यावेळी अरबाज, शूराच्या आईसह कुटुंबातील काही सदस्यही रुग्णालयात उपस्थित होते. शूराने जूनमध्ये तिच्या गरोदरपणाची माहिती दिली होती.
मीडिया रिपोर्टनुसार, सलमान खानही त्याच्या पनवेल फार्महाऊसवरून त्याच्या कुटुंबासह आनंदाचा प्रसंग साजरा करण्यासाठी मुंबईला रवाना झाला. शूरापूर्वी अरबाजचे मलायका अरोराशी लग्न झाले होते. त्यांचा मुलगा अरहानचा जन्म २००२ मध्ये झाला होता. तथापि, २०१७ मध्ये परस्पर संमतीने त्यांचा घटस्फोट झाला. काही काळ डेटिंग केल्यानंतर, अरबाज आणि शूरा यांनी २४ डिसेंबर २०२३ रोजी एका खासगी समारंभात लग्न केले. हे लग्न अरबाजची बहीण अर्पिता खान शर्मा हिच्या घरी झाले.
अरबाज आणि शूराची पहिली भेट रवीना टंडनच्या "पटना शुक्ला" चित्रपटाच्या सेटवर झाली. अरबाज चित्रपटाचा निर्माता होता, तर शूरा मुख्य अभिनेत्रीची मेकअप आर्टिस्ट होती. त्यांच्या कामादरम्यान त्यांची मैत्री प्रेमात फुलली.