पाटणा: पंतप्रधान नरेंद्र मोदी आज बिहार विधानसभा निवडणुकीसाठी भारतीय जनता पक्षाच्या (भाजप) प्रचार मोहिमेचा औपचारिक शुभारंभ करणार आहेत. या अंतर्गत ते पक्षाच्या बूथ स्तरावरील कार्यकर्त्यांशी संवाद साधणार आहेत.
'मेरा बूथ सबसे मजबूत' अभियानाद्वारे संवाद
पंतप्रधान मोदी हे आज 'मेरा बूथ सबसे मजबूत' (माझे बूथ सर्वात मजबूत) या अभियानाअंतर्गत बिहारमधील भाजपच्या हजारो बूथ कार्यकर्त्यांशी व्हर्च्युअल माध्यमातून किंवा थेट संवाद साधतील. या संवादात ते कार्यकर्त्यांना निवडणुकीत विजयाचा 'मूल-मंत्र' देतील आणि त्यांच्याकडून आगामी विधानसभा निवडणुकांबाबतच्या सूचना ऐकून घेतील.
यापूर्वीच पंतप्रधान मोदी यांनी सोशल मीडिया प्लॅटफॉर्मवर बिहारमधील भाजप आणि राष्ट्रीय लोकशाही आघाडी (NDA) च्या समर्पित कार्यकर्त्यांना पूर्ण ऊर्जेने कामाला लागण्याचे आवाहन केले होते. तसेच, त्यांनी 'मेरा बूथ सबसे मजबूत' अभियानाशी जोडले जाऊन आपले सूचना त्वरित सामायिक करण्याचे आवाहन केले होते. ते स्वतः या सूचनांवर थेट चर्चा करणार असल्याचे त्यांनी सांगितले होते.
बिहार विधानसभेच्या २४३ जागांसाठी दोन टप्प्यात मतदान होणार आहे.
पहिला टप्पा: ६ नोव्हेंबर
दुसरा टप्पा: ११ नोव्हेंबर
मतमोजणी आणि निकाल: १४ नोव्हेंबर
निवडणुका जवळ आल्या असताना, पंतप्रधान मोदींचा हा संवाद कार्यकर्त्यांमध्ये उत्साह भरण्याचे काम करेल.
भाजपने ७१ उमेदवारांची पहिली यादी केली जाहीर
दरम्यान, भाजपने बिहार विधानसभा निवडणुकीसाठी आपल्या ७१ उमेदवारांची पहिली यादी काल जाहीर केली आहे. या यादीत पक्षाच्या काही ज्येष्ठ नेत्यांना तिकीट देण्यात आले आहे, तर काही दिग्गजांचे तिकीट कापण्यात आले आहे. या यादीमध्ये ९ महिला उमेदवारांचा समावेश आहे.