पश्चिम बंगाल, आसाम, केरळ, पुडुचेरी, तामिळनाडूत सर्वप्रथम एसआयआर प्रक्रिया
नवी दिल्ली : निवडणूक आयोगाने देशभरातील मुख्य निवडणूक अधिकाऱ्यांची एक महत्त्वाची दोन दिवसांची बैठक घेतली. हे सगळे अधिकारी राज्या-राज्यात मतदारांची यादी बनवण्याचे काम पाहतात. मुख्य निवडणूक आयुक्त ज्ञानेश कुमार आणि निवडणूक आयुक्त सुखबीर सिंग संधू आणि विवेक जोशी यांनी या बैठकीचे नेतृत्व केले.
या बैठकीत २०२६ मध्ये होणाऱ्या विधानसभा निवडणुकांसाठी मतदार याद्या अगदी बरोबर आणि १००% पूर्ण असाव्यात, यासाठी तयारी पक्की करण्यात आली. निवडणूक आयोगाने स्पष्ट सांगितले की, मतदारांची यादी बनवण्याचे काम केवळ एक रीत नाही, तर लोकशाहीचा आधार मजबूत करण्याचे काम आहे.
या कामात मदत करणाऱ्या मतदान केंद्र अधिकाऱ्यांच्या आणि इतर कर्मचाऱ्यांच्या प्रशिक्षणावर आणि कामावरही चर्चा झाली. विशेषतः आसाम, तामिळनाडू, केरळ, पुद्दुचेरी आणि पश्चिम बंगाल यांसारख्या ज्या राज्यांमध्ये लवकरच निवडणुका आहेत, त्यांच्या अधिकाऱ्यांशी खास चर्चा करून त्यांना मार्गदर्शन करण्यात आले.
या प्रक्रियेचा मुख्य उद्देश मतदार यादीतील अवैध विदेशी घुसखोरांची ओळख पटवणे असल्याचे मानले जात आहे. पहिल्या टप्प्यात, ही मोहीम त्या राज्यांमध्ये सुरू होईल जिथे २०२६ मध्ये विधानसभा निवडणुका आहेत, जसे की पश्चिम बंगाल, आसाम, केरळ, पुडुचेरी आणि तामिळनाडू.
आयोगाच्या अधिकाऱ्यांनुसार, बिहारमध्ये नुकतीच एसआयआर प्रक्रिया राबवण्यात आली, ज्यानंतर ३० सप्टेंबर रोजी सुमारे ७.४२ कोटी मतदारांची अंतिम यादी प्रसिद्ध करण्यात आली. आयोगाचा प्रयत्न आहे की एसआयआर टप्प्याटप्प्याने लागू व्हावा, ज्यामुळे स्थानिक निवडणुकीच्या कामात गुंतलेल्या कर्मचाऱ्यांवर अतिरिक्त भार पडणार नाही.
मुख्य निवडणूक आयुक्त ज्ञानेश कुमार यांनी यापूर्वीच एसआयआर सुरू करण्याबाबत संकेत दिले होते. अनेक राज्यांनी गेल्या एसआयआर नंतरच्या मतदार याद्या वेबसाइटवर अपलोड केल्या आहेत. या मोहिमेमुळे जुन्या याद्यांमधील मृत, स्थलांतरित किंवा दोन ठिकाणी नावे असलेल्या मतदारांना वगळण्यास मदत होईल, ज्यामुळे याद्या शुद्ध आणि अचूक बनतील.