नवी दिल्ली : उपमुख्यमंत्री एकनाथ शिंदे (Eknath Shinde) यांनी मध्यरात्री तातडीने दिल्ली गाठल्यामुळे (Delhi Visit) राजकीय वर्तुळात चर्चेला उधाण आले आहे. विशेष म्हणजे, केंद्रीय गृहमंत्री अमित शाह (Amit Shah) हे लवकरच महाराष्ट्र दौऱ्यावर येत आहेत. त्यांच्या दौऱ्यापूर्वीच शिंदे यांनी दिल्ली गाठल्याने, महायुतीत (Mahayuti) काहीतरी नवीन घडामोड होणार का, याकडे सर्वांचे लक्ष लागले आहे. या अचानक झालेल्या दिल्ली दौऱ्याला विशेष महत्त्व प्राप्त झाले आहे, कारण ठाण्यासह (Thane) राज्यातील काही ठिकाणी शिंदे गट आणि भाजपमधील कुरबुरी वाढल्या आहेत. तसेच, शिंदेसेनेच्या आमदारांना निधी देण्यावरूनही नाराजी नाट्य सुरू आहे. या पार्श्वभूमीवर, महायुतीमधील मतभेद आणि भविष्यातील रणनीतीवर चर्चा करण्यासाठी हा दौरा अत्यंत महत्त्वाचा मानला जात आहे.
स्थानिक स्वराज्य संस्था निवडणुकांच्या तोंडावर महायुतीत धुसफुस
राज्यात स्थानिक स्वराज्य संस्थांच्या निवडणुकांची नांदी सुरू झाली असतानाच, महायुतीमधील घटक पक्ष असलेल्या शिंदेसेना आणि भाजपमध्ये धुसफुस वाढल्याचे चित्र आहे. भाजपमध्ये सध्या इनकमिंग वाढले असून, यात शिंदे सेना आणि अजित पवार गटातील जुन्या-जाणत्या नेत्यांचा समावेश असल्याची चर्चा आहे, ज्यामुळे शिंदेसेनेमध्ये नाराजी पसरली आहे. अनेक ठिकाणी भाजपच्या स्थानिक नेत्यांनी 'स्वबळाचा' नारा दिला आहे. ठाण्यासह (Thane) इतरही काही भागांत दोन्ही पक्षांतील धुसफुस चव्हाट्यावर आली आहे. तसेच, आमदारांना निधी वाटपावरूनही सध्या नाराजी नाट्य असल्याचे बोलले जात आहे. या सर्व पार्श्वभूमीवर उपमुख्यमंत्री एकनाथ शिंदे यांच्या दिल्ली दौऱ्यात नेमके कोणत्या विषयावर चर्चा होणार, हे अद्याप स्पष्ट झालेले नाही. मात्र, महायुतीतील वाद मिटवण्यासाठी हा दौरा महत्त्वाचा मानला जात आहे.
एकनाथ शिंदे आज पंतप्रधान मोदी आणि अमित शहा यांची भेट घेणार
उपमुख्यमंत्री एकनाथ शिंदे यांनी मध्यरात्री दिल्लीत दाखल झाल्यानंतर आज (शनिवार) सकाळीच ते दिल्लीतील वरिष्ठ नेत्यांच्या भेटीगाठी घेणार असल्याचे समोर आले आहे. मिळालेल्या माहितीनुसार, शिंदे हे केंद्रीय गृहमंत्री अमित शाह (Amit Shah) आणि पंतप्रधान नरेंद्र मोदी (PM Narendra Modi) यांची भेट घेणार आहेत. आज सकाळीच शिंदे मोदींच्या भेटीला निघाल्याचे वृत्त आहे. शिंदे या भेटीत राज्यातील नेमक्या कोणत्या महत्त्वाच्या विषयांवर चर्चा करतात, याची माहिती लवकरच समोर येईल. महायुतीमधील धुसफुस आणि स्थानिक स्वराज्य संस्थांच्या निवडणुकीच्या पार्श्वभूमीवर हा दिल्ली दौरा अत्यंत महत्त्वाचा मानला जात आहे. शिंदे हे खासदार डॉ. श्रीकांत शिंदे यांच्या बंगल्यावरून भेटीसाठी रवाना झाले आहेत.
केंद्रीय गृहमंत्री अमित शहा यांच्या दौऱ्यामुळे फडणवीसांचा मंगळवेढा दौरा पुढे ढकलला
केंद्रीय गृहमंत्री अमित शाह हे महाराष्ट्र दौऱ्यावर येत असल्याने राज्याचे मुख्यमंत्री देवेंद्र फडणवीस (Devendra Fadnavis) यांच्या नियोजित कार्यक्रमात बदल करण्यात आले आहेत. उद्या (रविवार) मंगळवेढा (Mangalwedha) येथे होणारा फडणवीस यांचा दौरा रद्द करण्यात आला आहे. आता ते २ नोव्हेंबर रोजी मंगळवेढ्याला जाणार असल्याचे समोर येत आहे. मंगळवेढा येथे छत्रपती शिवाजी महाराजांच्या पुतळ्याचे अनावरण करण्याचा कार्यक्रम आयोजित करण्यात आला होता, तो आता पुढे ढकलण्यात आला आहे. या कार्यक्रमाच्या निमित्ताने मुख्यमंत्री देवेंद्र फडणवीस आणि मराठा आंदोलक नेते मनोज जरांगे पाटील (Manoj Jarange Patil) हे एकाच व्यासपीठावर येणार असल्याची जोरदार चर्चा राजकीय वर्तुळात होती. दौरा रद्द झाल्यामुळे या चर्चांना तात्पुरता विराम मिळाला आहे. दरम्यान, पुतळ्याच्या अनावरण कार्यक्रमासाठी उत्सुक असलेले शिवप्रेमी नाराज झाल्याचे बोलले जात आहे.