फलटण उपजिल्हा रुग्णालयातील महिला वैद्यकीय अधिकाऱ्याने पोलिस आणि राजकीय दबावाला कंटाळून आत्महत्या केल्याने राज्यात संतापाची लाट उसळली आहे. मुळची बीड जिल्ह्याची असलेली ही तरुण डॉक्टर 23 ऑक्टोबरच्या रात्री फलटणमधील एका नामांकित हॉटेलमध्ये गळफास घेतलेल्या अवस्थेत मृतावस्थेत सापडली. गेल्या पाच महिन्यांपासून तिचा पोलिस अधिकाऱ्यांकडून आणि काही प्रभावशाली व्यक्तींंकडून मानसिक व लैंगिक छळ होत असल्याचे स्पष्ट झाले आहे.
आता पर्यंत काय काय घडलं:
१९ जून २०२५ रोजी डॉक्टर तरुणीने फलटणचे उपविभागीय पोलिस अधिकारी (DySP) यांच्याकडे PSI गोपाळ बदने व इतरांविरोधात लैंगिक छळ आणि अत्याचाराबाबत लेखी तक्रार दाखल केली होती. मात्र या तक्रारीवर कोणतीही ठोस कारवाई करण्यात आली नाही. त्यानंतर जून ते ऑक्टोबर दरम्यान तिच्यावर वैद्यकीय तपासात अडथळा आणला असा आरोप करून विभागीय चौकशी लावण्यात आली. वरिष्ठ अधिकाऱ्यांना पाठवलेल्या पत्रांमध्ये तिने सततच्या छळामुळे मानसिक ताण व आत्महत्येच्या विचारांबाबत इशारा दिला होता.
२३ ऑक्टोबरच्या रात्री, भाऊबीज दिवशी, ती आपल्या हॉटेल रूममध्ये मृतावस्थेत आढळली. तिच्या हाताच्या तळव्यावर लिहिलेल्या चिठ्ठीत PSI गोपाळ बदने आणि प्रशांत बनकर या दोघांची नावे होती. कुटुंबीय व सहकाऱ्यांचा आरोप आहे की शवविच्छेदन प्रकरणांमध्ये दस्तऐवज बदलण्याचा दबाव तिच्यावर आणला जात होता.
२४ ऑक्टोबर रोजी सातारा पोलिसांनी दोघांविरोधात बलात्कार आणि आत्महत्येस प्रवृत्त केल्याचे गुन्हे दाखल केले. मुख्यमंत्री देवेंद्र फडणवीस यांनी तातडीने PSI बदने यांना निलंबित करून चौकशीचे आदेश दिले. प्रशांत बंकरला अटक झाली असून गोपाळ बादणे फरार आहे. त्याच्या शोधासाठी विशेष पथके नेमण्यात आली आहेत.
ते खासदार कोण?
डॉ. तरुणीने केलेल्या गंभीर आरोपानुसार, एका खासदार आणि त्यांच्या दोन पीएंनी फोनवरून संवाद साधला असल्याचे समोर आले आहे. संबंधित नेत्याचे नाव स्पष्ट न केल्याने तो विद्यमान की माजी खासदार असा प्रश्न निर्माण झाला आहे. या पार्श्वभूमीवर ठाकरे गटाचे नेते अंबादास दानवे यांनी भाजप नेते आणि माजी खासदार रणजितसिंह निंबाळकर यांचे नाव घेतले आहे. तसेच खासदारांचे पीए राजेंद्र शिंदे आणि नागटिळक यांचा या प्रकरणात थेट संबंध असल्याचा आरोप करण्यात आला आहे.