मेक्सिको : सणासुदीच्या काळात मेक्सिकोच्या सोनारा राज्यात घडलेल्या भीषण दुर्घटनेने संपूर्ण देशाला हादरवून सोडलं आहे. हार्मोसिलो शहरातील एका सुपरमार्केटला लागलेल्या भीषण आगीत २३ जणांचा मृत्यू झाला असून, त्यात अनेक लहान मुलांचा समावेश आहे. या घटनेत १० हून अधिक नागरिक जखमी झाले आहेत.
ही दुर्दैवी घटना घडली तेव्हा देशभरात ‘डे ऑफ द डेड’ हा पारंपरिक सण साजरा केला जात होता. आपल्या पूर्वजांच्या स्मरणार्थ कुटुंबं एकत्र येत असतानाच या दुर्घटनेमुळे आनंदाचे वातावरण शोकांतिकेत बदलले.
सोनारा राज्याचे अॅटर्नी जनरल गुस्तावो सालास यांनी दिलेल्या माहितीनुसार, बहुतांश मृत्यू विषारी वायूच्या श्वसनामुळे झाल्याची शक्यता आहे. आगीमुळे संपूर्ण इमारतीत दाट धूर पसरल्याने लोकांचा श्वास गुदमरला. घटनास्थळी फॉरेन्सिक पथकं पोहोचली आहेत. त्यांनी तपास सुरू केला आहे.
विद्युत बिघाडामुळे आग लागल्याचा प्राथमिक अंदाज वर्तवला जात आहे. हार्मोसिलो नगरपालिकेनं मात्र हा दहशतवादी हल्ला नसल्याचं स्पष्ट केलं आहे.
राज्यपाल अल्फोन्सो दुराजो यांनी सखोल तपासाचे आदेश दिले असून, “या घटनेत अनेक मुलांचा मृत्यू झाल्याने ही दुर्घटना अत्यंत वेदनादायक आहे,” असं ते म्हणाले. त्यांनी सोशल मीडियावरून पीडित कुटुंबीयांबद्दल सहवेदना व्यक्त केल्या.
दरम्यान, मेक्सिकोच्या अध्यक्षा क्लाऊडिया शीबनाम यांनी एक्सवर पोस्ट करत मृतांना श्रद्धांजली अर्पण केली. “या भीषण आगीत आपल्या जवळच्या व्यक्तींना गमावणाऱ्या सर्व कुटुंबांसोबत माझ्या संवेदना आहेत. प्रशासनाचं बचावकार्य सुरू आहे,” असं त्यांनी म्हटलं आहे.
सोनारा रेड क्रॉसच्या ४० सदस्यांनी आणि १० रुग्णवाहिकांनी घटनास्थळी धाव घेत मदतकार्य हाती घेतलं आहे. अग्निशमन दलाने आगीवर नियंत्रण मिळवलं असून, अजूनही ढिगाऱ्याखाली अडकलेल्यांचा शोध सुरू आहे.