मुंबई : महाराष्ट्राचे अन्न, नागरी पुरवठा आणि ग्राहक संरक्षण मंत्री छगन भुजबळ (Chhagan Bhujbal) यांच्यावर मुंबईतील एशियन हार्ट इन्स्टिट्यूट (Asian Heart Institute) येथे नुकतीच यशस्वीरित्या हृदय शस्त्रक्रिया (Heart Surgery) पार पडली आहे. ही शस्त्रक्रिया अत्यंत महत्त्वाची होती आणि डॉक्टरांनी ती यशस्वी केली आहे. शस्त्रक्रियेनंतर मिळालेल्या माहितीनुसार, मंत्री छगन भुजबळ यांची प्रकृती सध्या स्थिर असून, त्यांच्या तब्येतीत सुधारणा होत आहे. डॉक्टरांच्या पथकाने त्यांची कसून तपासणी केली असून, त्यांना पुढील काही दिवस पूर्ण विश्रांती घेण्याचा सल्ला देण्यात आला आहे. कार्यालयाने दिली महत्त्वाची माहिती, भुजबळ यांच्या कार्यालयातर्फे जारी करण्यात आलेल्या निवेदनात स्पष्ट करण्यात आले आहे की, त्यांच्या प्रकृतीत लवकर आणि पूर्ण सुधारणा व्हावी, यासाठी डॉक्टरांच्या सल्ल्यानुसार त्यांना सध्या कोणालाही भेटता येणार नाही. त्यांची प्रकृती स्थिर असल्याने त्यांच्या हितचिंतकांनी आणि कार्यकर्त्यांनी काळजी करू नये, असे आवाहन करण्यात आले आहे. मंत्री भुजबळ लवकरच पूर्णपणे बरे होऊन पुन्हा एकदा आपल्या शासकीय कामात आणि सार्वजनिक कार्यात सक्रिय होतील, असा विश्वासही त्यांच्या कार्यालयाने व्यक्त केला आहे. या शस्त्रक्रियेमुळे त्यांना काही काळ आपल्या कामातून ब्रेक घ्यावा लागणार असला तरी, ते लवकरच पूर्ण उत्साहाने जनसेवेत रुजू होतील, अशी अपेक्षा व्यक्त होत आहे.
सततच्या दौऱ्यांमुळे प्रकृती खालावली!
गेल्या काही दिवसांमध्ये मंत्री भुजबळ यांचे सतत मेळावे आणि दौरे आयोजित करण्यात आले होते. या सातत्यपूर्ण दौऱ्यांमुळे आणि वाढलेल्या दगदगीमुळे त्यांची प्रकृती खालावण्यास सुरुवात झाली होती. प्रकृती अस्वस्थ असल्याने त्यांना अनेक दिवसांपासून काही अडचणी जाणवत होत्या. गेल्या आठवड्यात झालेल्या मंत्रिमंडळाच्या बैठकीला त्यांनी उपस्थिती लावली. मात्र, त्यानंतर त्यांना अति थकवा जाणवू लागला. थकवा वाढल्याने त्यांना तातडीने जसलोक रुग्णालयात दाखल करण्यात आले होते. जसलोक रुग्णालयानंतर, पुढील उपचारांसाठी त्यांना एशियन हार्ट इन्स्टिट्यूटमध्ये हलवण्यात आले आणि तिथेच त्यांच्यावर यशस्वीरित्या हृदय शस्त्रक्रिया करण्यात आली.
सध्याची स्थिती :
सध्या त्यांची प्रकृती स्थिर असून डॉक्टरांनी त्यांना काही दिवस सक्तीची विश्रांती घेण्याचा सल्ला दिला आहे. त्यामुळे, पूर्णपणे बरे होईपर्यंत ते कोणालाही भेटणार नाहीत.