कोची : स्वदेशी बनावटीचे ‘इक्षक’ जहाज गुरुवारी भारतीय नौदलात औपचारिकरित्या सामील झाले आहे. नौदलप्रमुख ॲडमिरल दिनेश त्रिपाठी हे यावेळी प्रमुख पाहुणे म्हणून उपस्थित होते. नौदलाच्या या जहाजाचे निर्माण कोलकातास्थित ‘गार्डन रीच शिपबिल्डर्स अँड इंजिनियर्स लिमिटेड’ने केले आहे.
संरक्षण मंत्रालयाच्या माहितीनुसार, ‘इक्षक’ हे भारताच्या वाढत्या आत्मनिर्भरतेचे आणि स्वदेशी जहाजबांधणी क्षमतेचे उत्कृष्ट प्रतीक आहे. या जहाजामध्ये ८० टक्क्यांहून अधिक स्वदेशी उपकरणे आणि साहित्याचा वापर करण्यात आला आहे.
‘इक्षक’ या संस्कृत शब्दाचा अर्थ ‘मार्गदर्शक’ असा आहे. हे नाव या जहाजाच्या अचूकता, उद्देश आणि दिशा दाखवण्याच्या भूमिकेचे प्रतीक आहे. हे जहाज बंदर, किनारे आणि नौवहन मार्गांवर सखोल किनारी व खोल समुद्री सर्वेक्षण करण्यासाठी तयार केले गेले आहे. हाय-रिझोल्यूशन मल्टी-बीम इको साउंडर, ऑटोनॉमस अंडरवॉटर व्हेईकल, रिमोटली ऑपरेटेड व्हेईकल आणि चार सर्व्हे मोटर बोट्स यांसारख्या अत्याधुनिक हायड्रोग्राफिक आणि समुद्रविज्ञान उपकरणांनी हे जहाज सुसज्ज आहे.