नागपूर: महाराष्ट्र विधिमंडळाचे हिवाळी अधिवेशन ८ ते १९ डिसेंबर दरम्यान नागपूरमध्ये होणार असल्याची माहिती अधिकाऱ्यांनी दिली. २८ नोव्हेंबरपासूनच नागपूरमध्ये सचिवालयाचे कामकाज सुरू होणार आहे.
स्थानिक स्वराज्य संस्थांच्या निवडणुकांमुळे अधिवेशन मुंबईत होण्याची शक्यता वर्तवली जात होती. महसूल मंत्री चंद्रशेखर बावनकुळे यांनी अधिवेशनाला ८ ते १० दिवसांचा विलंब होण्याची शक्यता वर्तवली होती, पण विधानमंडळ सचिवालयाने वेळेवरच अधिवेशन होणार असल्याचे स्पष्ट केले आहे.
अधिवेशनासाठी साहित्य २६ नोव्हेंबरपासून मुंबईतून नागपूरला पोहोचण्याची अपेक्षा आहे, तर कर्मचारी २७ नोव्हेंबरपर्यंत नागपूरला पोहोचतील. १० कामकाजाचे दिवस असलेल्या या अधिवेशनात पहिल्याच दिवशी राज्य सरकार पुरवणी मागण्या सादर करेल आणि १० डिसेंबरला यावर चर्चा होऊन मतदान होईल. अधिवेशन वाढवण्याची शक्यता नसल्याचे स्पष्ट झाले आहे.