मुंबई : टीम इंडियाचा स्टार ऑलराउंडर हार्दिक पांड्या आणि अभिनेत्री महिका शर्मा सध्या सोशल मीडियावर चांगलेच चर्चेत आहेत. काही दिवसांपूर्वी त्यांच्या अफेअरच्या चर्चा सुरू झाल्या, दोघांचे एकत्र फोटो व्हायरल होऊ लागले. हार्दिक आणि महिका एकत्र फिरताना दिसू लागल्यापासूनच चाहत्यांमध्ये त्यांच्या नात्यावरून संशय व्यक्त केला जात होता.
यातच आता हार्दिकने आपल्या इन्स्टाग्रामवर ‘बिग 3’ नावाने तीन फोटो शेअर केले, ज्यात महिका, त्याचा मुलगा अगस्त्य आणि त्याचा पाळीव कुत्रा दिसत आहेत. या फोटोंमध्ये हार्दिक आणि महिका एकमेकांच्या जवळ दिसत असल्याने चाहत्यांचा गोंधळ आणखी वाढला आहे.
साखरपुड्याच्या चर्चांना उधाण
एका फोटोने तर साखरपुड्याच्या चर्चांना चांगलीच हवा दिली आहे. त्या फोटोमध्ये दोघे एकत्र प्रार्थना करताना दिसतात आणि महिकाच्या बोटातील रिंगने साऱ्यांचे लक्ष गेले.आणखी एका फोटोमध्ये हार्दिक महिकाच्या गालावर किस करताना दिसतोय, तर काही फोटोमध्ये हे कपल पारंपारिक पोशाखात पूजा करताना दिसले. मात्र दोघांनीही या अफवांवर अद्याप काही भाष्य केलेले नाही.
हार्दिक आणि महिकाची जवळीक कशी वाढली?
नताशा स्टॅनकोविकपासून विभक्त झाल्यानंतर हार्दिक आणि महिकामधील जवळीक वाढू लागली. हार्दिक आणि नताशाचे लग्न तब्बल चार वर्ष टिकले असून दोघांना अगस्त्य नावाचा मुलगा आहे. पण त्यांनी २०२४ मध्ये त्यांनी दोघांच्या सहमतीने विभक्त होण्याचा निर्णय घेतला.
घटस्फोटानंतर काही दिवस हार्दिकचे नाव अभिनेत्री जास्मिन वालियाशी जोडले गेले होते. मात्र त्या चर्चांना पूर्णविराम मिळाला जेव्हा हार्दिकने महिकाच्या वाढदिवशी तिच्यासोबतचे फोटो शेअर केले. यापूर्वीही हे जोडपे सुट्टीसाठी एकत्र गेलेले फोटो शेअर करून चर्चेत आले होते. ऑक्टोबर महिन्यात दोघे मुंबई विमानतळावर दिसले, तेव्हाच ते पहिल्यांदा चर्चेत आले.
महिका शर्मा विषयी
२४ वर्षीय महिका शर्मा ही मॉडेल आणि अभिनेत्री असून फॅशन आणि फिटनेसविषयीचे कंटेंट सोशल मीडियावर शेअर करते. रॅपर रागाच्या म्युझिक व्हिडिओमधून ती चर्चेत आली. तिने ऑरलँडो वॉन आइन्सीडेल यांच्या ‘इनटू द डस्क’ आणि ओमंग कुमार दिग्दर्शित ‘पीएम नरेंद्र मोदी’ चित्रपटात लहान भूमिका केल्या आहेत. महिकाने अनेक नामांकित डिझायनर्ससाठी मॉडेलिंग केले आहे. ती लीन सिक्स सिग्मा ब्लॅक बेल्ट सर्टिफाइड असून अॅडव्हान्स योगा इन्स्ट्रक्टरचे प्रशिक्षणही तिने घेतले आहे.