अमेरिका: रशियासोबत युद्ध संपवण्यासाठी प्रस्तावित अमेरिकेच्या करार आराखड्यावर युक्रेनने सहमती दर्शविली आहे. यामुळे मागील दोन वर्षांपेक्षा जास्त काळ सुरु असलेले रशिया-युक्रेन युद्ध आता लवकरच संपेल अशी आशा व्यक्त केली जात आहे. युक्रेनचे राष्ट्राध्यक्ष वोलोदिमिर झेलेन्स्की यांनी सांगितले की अनेक मुद्दे अद्याप अनुत्तरित आहेत. अबू धाबीमध्ये अमेरिकेचे लष्कर सचिव डॅन ड्रिस्कॉल आणि रशियन प्रतिनिधी यांच्यातील चर्चेदरम्यान हे विधान आले आहे. दरम्यान, रशिया-युक्रेन युद्ध संपवण्याची बहुचर्चित योजना आता सुव्यवस्थित आणि अंतिम झाली आहे, असा दावा अमेरिकेचे राष्ट्राध्यक्ष डोनाल्ड ट्रम्प यांनी केला आहे.
अमेरिकेचे लष्कर सचिव डॅन ड्रिस्कॉल यांनी अबुधाबीमध्ये रशियन अधिकाऱ्यांशी दोन दिवसीय चर्चा केली. या चर्चेत काही किरकोळ मुद्दे अजूनही सोडवायचे असले तरी युक्रेनने शांतता करारावर सहमती दर्शविली असल्याचे सांगितले जात आहे. याव्यतिरिक्त युक्रेनचे राष्ट्रीय सुरक्षा सचिव रुस्तम उमरोव यांनी सोशल मीडीयावर पोस्ट करत सांगितले आहे की, "जिनेव्हा येथे झालेल्या युक्रेनियन आणि अमेरिकन शिष्टमंडळांमधील उत्पादक आणि रचनात्मक बैठका आणि युद्ध संपवण्यासाठी राष्ट्राध्यक्ष ट्रम्प यांच्या अथक प्रयत्नांचे आम्ही कौतुक करतो. जिनेव्हा येथे चर्चा झालेल्या कराराच्या मुख्य अटींवर दोन्ही बाजूंनी एकमत झाले आहे."
अमेरिकेने तयार केलेल्या शांतता योजनेत अनेक गोष्टींचा समावेश होता. ज्या युक्रेनने मागील वाटाघाटींमध्ये नाकारल्या होत्या. युक्रेनला त्याच्या सशस्त्र दलांच्या आकारावरील मर्यादा स्वीकारणे, नाटोमध्ये सामील होण्याचे प्रयत्न सोडून देणे आणि काही प्रदेश रशियाला देण्यास सांगितले होते. या सर्व रशियाच्या दीर्घकालीन मागण्या आहेत, कारण राष्ट्राध्यक्ष व्लादिमीर पुतिन जास्तीत जास्त सवलती मागत आहेत. मात्र युक्रेनचे राष्ट्राध्यक्ष झेलेन्स्कीने रशियाच्या मागण्या नाकारल्या. या ठरावात डोनबास प्रदेशातील मुख्य भाग कीवला सोपवण्याची मागणी देखील करण्यात आली आहे. ज्यावर रशियाने कब्जा केला असला तरी हा भाग ते पूर्णपणे नियंत्रित करत नाही. या भागात अशी शहरे आहेत जी युक्रेनच्या संरक्षण धोरणाचा केंद्रबिंदू आहे.