वैष्णवी पाटील या आपल्या सहकाऱ्यांसोबत इनोव्हा कारमधून प्रवास करत होत्या. रविवारी पहाटेच्या सुमारास त्यांच्या कारने समोर चाललेल्या एका लॉरीला मागून जोरदार धडक दिली आणि धडक इतकी भीषण होती की इनोव्हा कारच्या पुढील भागाचा चक्काचूर झाला. या अपघातात कारमधील दोन प्रवाशांचा जागीच मृत्यू झाला. मृतांची नावे अद्याप अधिकृतरीत्या जाहीर करण्यात आलेली नाहीत. अपघातामुळे प्रवाशांना गंभीर दुखापत झाली आहे. गाडीचेही प्रंचड नुकसान झाल आहे.
अपघाताची माहिती मिळताच स्थानिक पोलिसांनी तातडीने घटनास्थळी धाव घेतली. जखमींना तात्काळ चित्रदुर्ग येथील जिल्हा रुग्णालयात उपचारासाठी दाखल करण्यात आले. DYSP वैष्णवी पाटील यांच्यावर सध्या उपचार सुरू असून डॉक्टरांनी त्यांची प्रकृती स्थिर असल्याचे सांगितले आहे. इतर दोन जखमींवरही उपचार सुरू असून त्यांची प्रकृती गंभीर असल्याची माहिती आहे.कर्तव्यदक्ष आणि प्रामाणिक अधिकारी म्हणून ओळखल्या जाणाऱ्या वैष्णवी पाटील यांच्या अपघाताची बातमी समजताच कोल्हापूर पोलीस दल आणि अँटी करप्शन ब्युरोच्या वर्तुळात मोठी खळबळ उडाली आहे. कोल्हापूरमधील वरिष्ठ पोलीस अधिकारी चित्रदुर्ग पोलिसांच्या सतत संपर्कात असून पुढील कायदेशीर प्रक्रिया सुरू करण्यात आली आहे.