मुंबई (विशेष प्रतिनिधी): मुंबईच्या महापौर पदी अखेर भाजपचा महापौर विराजमान झाला. मुंबईच्या महापौर आणि उपमहापौर पदासाठी प्रतिस्पर्धी पक्षाकडून उमेदवारी अर्ज सादर न केल्याने निवडणुकीची औपचारिकता पार पडत पिठासीन अधिकारी डॉ भूषण गगराणी यांनी महापौरपदी भाजपच्या नगरसेविका रितू तावडे आणि उपमहापौर पदी संजय घाडी यांची निवड झाल्याचे जाहीर केले. त्यामुळे तब्बल ४४ वर्षांनी भाजपचा महापौर मुंबई महापालिकेत विराजमान होत खऱ्या अर्थाने महापालिकेवर भाजपचा भगवा डौलाने फडकला गेला आणि मागील चार दशकांचे भाजपचे स्वप्न साकार झाले.
मुंबई महापालिका सभागृहात महापौर आणि उपमहापौर पदाची निवडणूक बुधवारी दुपारी पार पडली. या निवडणुकीत पिठासीन अधिकारी म्हणून महापालिका आयुक्त डॉ भूषण गगराणी यांनी कामकाज पाहिले. प्रत्येक पक्षाच्या गटनेत्यांनी महापालिका सचिव यांनी विभागून दिलेल्या जागेत आपल्याला नगरसेवकांना ज्येष्ठते नुसार बसवून घेतल्यानंतर दुपारी प्रत्यक्ष निवडणुकीला सुरुवात झाली. भाजप आणि उबाठा यांच्याकडून जोरदार घोषणाबाजी सुरू. मोदी मोदी घोषणा भाजपकडून तर त्यांना उबाठा कडून ठाकरे अशा घोषणा देण्यात आल्या..१२.०७ मिनिटाला सुरुवात झाली. वंदे मातरम् झाल्यानंतर काँग्रेस पक्षाचे नगरसेवक सभागृहात दाखल झाले.
या निवडणुकीला सुरुवात होतात उबाठा गटनेत्या किशोरी पेडणेकर यांनी हरकतीच्या मुद्द्याद्वारे पिठासीन अधिकारी म्हणून नावाने अध्यादेश काढत आजवरच्या प्रथा आणि परंपरेला छेद दिल्याचा आरोप करत पिठासीन अधिकाऱ्यांना धारेवर धरण्याचा प्रयत्न केला. पण पिठासीन अधिकारी यांनी यावर उत्तर देत त्यांचा मुद्दा उडवून लावला. त्यानंतर पिठासीन अधिकारी यांनी निवडणुकीला सुरुवात करत, एकही अर्ज न आल्याने महापौर पदासाठी एकमेव अर्ज आल्याने रितू तावडे यांची निवड महापौर पदासाठी करत असल्याचे घोषित केले. त्यानंतर पिठासीन अधिकारी यांनी उपमहापौर पदासाठी एकमेव अर्ज आल्याने संजय घाडी यांची निवड उपमहापौर पदासाठी करत असल्याचे घोषित केले. या दोघांच्या निवडीनंतर सर्व सदस्यांनी बाके वाजवत त्यांचे स्वागत केले.